REGİONLAR


Muxtar respublikada çimərlik mövsümünə start verilib

Naxçıvan, 18 iyun, AZƏRTAC

İsti yay günlərində muxtar respublika sakinlərinin və qədim diyara gələn turistlərin istirahətinin səmərəli təşkili üçün müvafiq tədbirlər görülür, yeni xidmət sahələri və istirahət guşələri istifadəyə verilir. Belə istirahət yerlərindən biri də Uzunoba Su Anbarında yaradılan çimərlikdir.

AZƏRTAC-ın Naxçıvan bürosu xəbər verir ki, iyunun 17-də növbəti çimərlik mövsümünün açılışı olub.

Böyüklər və uşaqlar üçün nəzərdə tutulan çimərlik iki hissədən ibarətdir. Böyüklərin istirahəti üçün ayrılan sahə 10 min kvadratmetr olmaqla uzunluğu 255, eni 55, su hissəsinin dərinliyi relyefə uyğun olaraq 4-14 metrdir. Uşaqlar üçün nəzərdə tutulan sahə 1925 kvadratmetr, uzunluğu 60, eni 35, su hissəsinin dərinliyi isə 3 metrdir. Hər iki sahədə suyun üzərində çimərlik sərhədinin qurtardığını bildirən qadağanedici nişanlar qoyulub. Çimərlik ərazisində kölgəliklər və paltardəyişmə yerləri qurulub, idman meydançası, eləcə də avtomobil dayanacağı yaradılıb, ictimai-iaşə xidməti təşkil olunub. İstirahət zonasında su və digər idman növləri üzrə yarışların, eləcə də gənclərin iştirakı ilə müxtəlif tədbirlərin keçirilməsi üçün hərtərəfli şərait mövcuddur. Naxçıvan şəhərindən çimərliyə və əks istiqamətə marşrut xidməti fəaliyyət göstərir.

Çimərlik istirahət zonasında insanların təhlükəsizliyi də nəzərə alınıb, müşahidə qülləsi yaradılıb, ərazidə xəbərdaredici və məlumatlandırıcı lövhələr vurulub. Naxçıvan Muxtar Respublikası Fövqəladə Hallar Nazirliyinin Xüsusi Riskli Xilasetmə Xidmətinin sularda xilasetmə bölməsi xilasedici qayıqlarda 5 xilasedici və 1 həkimlə gündəlik xidmət aparır. Xidmət zamanı sahildəki müşahidə qülləsindən ətrafa davamlı nəzarət olunur. Hər hansı qayda pozuntusu qeydə alınarsa səsgücləndirici qurğu vasitəsilə xəbərdarlıq edilir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.