DÜNYA


Pakistan BMT-yə təcili olaraq Təhlükəsizlik Şurasının iclasının çağırılması ilə bağlı məktub göndərib

İslamabad, 15 avqust, AZƏRTAC

Pakistanın xarici işlər naziri Şah Mahmud Kureşi Cammu və Kəşmir problemi ilə əlaqədar Hindistanın regiondakı aqressiv fəaliyyəti ilə bağlı BMT-yə təcili olaraq Təhlükəsizlik Şurasının iclasının çağırılması ilə bağlı məktub göndərib.

AZƏRTAC xəbər verir ki, məktubda çağırılacaq iclasda Pakistan nümayəndəsinin iştirakı da xahiş olunur.

Xatırladaq ki, avqustun 5-də Hindistan Prezidenti Ram Natx Kovind ölkə Konstitusiyasının 370-ci maddəsində təsbit olunan, Pakistanla mübahisəli ərazi olan Cammu və Kəşmirə xüsusi status verilməsi maddəsini ləğv edib. Federal hökumətin təşəbbüsü ilə Cammu və Kəşmirin yerinə ştatdan az səlahiyyətləri olan iki ittifaq ərazisinin yaradılması nəzərdə tutulur. Bu təşəbbüs Hindistan parlamenti tərəfindən də dəstəklənib. Bundan sonra Pakistan ilə münasibətlər daha da gərginləşib.

Bir neçə gün əvvəl isə Pakistan Hindistan ilə diplomatik münasibətlərin gərginləşməsi fonunda ölkələr arasında ikitərəfli ticarət əlaqələrini dayandırıb. Tərəflər əvvəllər imzalanan bir sıra ikitərəfli sənədlərə yenidən baxmaq istədiklərini ifadə ediblər.

Pakistanın Baş naziri İmran Xan Hindistanın bu təşəbbüsünə cavab olaraq Cammu və Kəşmir problemi ilə əlaqədar Hindistan tərəfinə hüquqi, siyasi və diplomatik cavab verilməsi üçün xüsusi komitənin yaradılmasını qərara alıb.

Qulu Kəngərli

AZƏRTAC-ın xüsusi müxbiri

İslamabad

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.