DÜNYA


Avstriya koronavirus böhranı ilə əlaqədar Aİ-nin əvəzsiz subsidiyaların verilməsinə qarşıdır

Vyana, 23 may, AZƏRTAC

Avstriya Avropa İttifaqının koronavirus böhranın öhdəsindən gələ bilmək üçün əvəzi ödənilməyəcək subsidiyaların deyil, müddətli və geri ödənilməsi tələb olunan yardımlara tərəfdardır.

AZƏRTAC xəbər verir ki, bu fikirləri Avstriyanın Federal Kansleri Sebastian Kurts videoformatda qonaq qismində qatıldığı Almaniya Xristian-Sosialist İttifaqının (CSU) partiya qurultayında söyləyib. Qeyd edib ki, Avstriyanın da qoşulduğu bir neçə ölkə Aİ tərkibində “arxa qapıdan vəsaitlərin paylandığı borc ittifaqı” yaradılmasına qarşı çıxır, çünki əvəzsiz verilən subsidiyalar uzunmüddətli perspektivdə Avropaya zərər yetirəcək. Kansler koronavirus böhranı ilə əlaqədar çətin maliyyə vəziyyətinə düşən üzv ölkələrə əvəzi ödənməyən təcili subsidiya yardımları əvəzinə, geri ödənməli kredit proqramlarını dəstəklədiklərini ifadə edib.

Qeyd edilməlidir ki, Almaniya və Fransa hökumətləri Avropa Komissiyasına maliyyə bazarlarından Aİ adından kredit götürülməsinə icazə verən yardım planı təklif edib. Həmin vəsaitlər 500 milyard avroluq yenidənqurma fonduna daxil edilməli və Aİ büdcəsindən böhranın ağır zərbə vurduğu ölkələrə geri ödənməsi tələb olunmayan birdəfəlik subsidiyalar şəklində təqdim olunmalıdır.

Avstriya bu plana qarşı çıxaraq Niderland Krallığı, Danimarka və İsveçlə birlikdə alternativ plan təqdim edəcəklərini elan edib. Bu ölkələr ümumi borc hesabına ölkələrin dəstəklənməsini deyil, müəyyən şərtlər çərçivəsində kredit imkanlarının nəzərdə keçirilməsini istəyirlər.

Yaxın günlərdə dördlüyün maliyyə yardımı planı təqdim olunmalıdır.

Elgün Niftəli

AZƏRTAC-ın xüsusi müxbiri

Vyana

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.