Bakı, 15 oktyabr, AZƏRTAC

Azərbaycan Prezidentinin 2011-ci il 27 dekabr tarixli Sərəncamı ilə təsdiq edilmiş “Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramı” əsasında dairə seçki komissiyalarının üzvləri və məntəqə seçki komissiyalarının sədrləri üçün oktyabrın 15-də 15 saylı Yasamal birinci dairə seçki komissiyasında ixtisaslaşdırılmış kurslar keçirilir.

AZƏRTAC xəbər verir ki, dairə seçki komissiyasının sədri Cumar İsayev 15 saylı Yasamal birinci dairə seçki komissiyasında aparılan hazırlıq işləri ilə bağlı məlumat verib. O qeyd edib ki, komissiya üzvlərinin normal fəaliyyət göstərməsi üçün məntəqələrdə hər cür şərait yaradılıb. Dairə seçki komissiyası səsvermə prosesinin əvvəlki seçkilərdə olduğu kimi, bu dəfə də Seçki Məcəlləsində, Konstitusiyada və digər qanunvericilik aktlarında nəzərdə tutulmuş qaydada, təlimata uyğun yüksək səviyyədə keçirilməsini təmin edəcək.

Sədr bələdiyyə seçkiləri ilə bağlı hazırlıq işlərindən də danışıb.

Yasamal Rayon İcra Hakimiyyəti başçısının müavini Xaliq Mehbalıyev seçici siyahılarının hazırlanması, seçkiqabağı təşviqatın aparılmasına şərait yaradılması, bildirişlərin seçicilərə çatdırılması və s. bu kimi istiqamətlərdə yerli icra və bələdiyyə qurumlarının rolu və onların seçki komissiyaları ilə səmərəli qarşılıqlı əlaqələrinin qurulması işləri ilə bağlı məlumat verib. Bundan başqa, ixtisaslaşdırılmış kurslarda, həmçinin seçkilərə hazırlıq prosesində dairə və məntəqə seçki komissiyalarının üzərinə düşən vəzifələrdən bəhs edilib. Bununla yanaşı, Seçki hüququ və onun təminatının qanunvericilik əsasları, aşağı seçki komissiyaları və məhkəmələr tərəfindən seçki hüququnun qorunması mexanizmlərindən söhbət açılıb.