DÜNYA


ABŞ İranın Neft naziri və nazirliyini sanksiya siyahısına salıb

Bakı, 27 oktyabr, AZƏRTAC

ABŞ İranın Neft Nazirliyi, İran Milli Neft Şirkəti (NIOC) və İran Milli Tanker Şirkətini (NITC), eləcə də İranın Neft naziri Bijən Namidar Zəncənəni sanksiya siyahısına əlavə edib.

AZƏRTAC xəbər verir ki, ABŞ rəhbərliyi yuxarıda adları çəkilən qurumlar və şəxsə qarşı bu addımı İran İnqilab Keşikçiləri Ordusunun tabeliyindəki Qüds Gücü qruplaşmasına maddi dəstək verildiyi üçün atıb.

ABŞ-ın Maliyyə Nazirliyinin yazılı açıqlamasında, Xarici Aktivlərin Mühafizəsi Ofisi (OFAC) tərəfindən İranın Neft Nazirliyi, NIOC və NITC ilə əlaqəli birdən çox təşkilat və şəxsə qarşı sanksiya tətbiq ediləcəyi bildirilib. Bu çərçivədə İranın Neft naziri Bijən Namidar Zəncənə də daxil olmaqla bu təşkilatların yüksək vəzifəli şəxsləri sanksiya siyahısına daxil edilib.

Açıqlamada sözügedən sanksiyaların İran İnqilab Keşikçiləri Ordusunun tabeliyindəki Qüds Gücü üçün gəlir gətirən neftin tədarükünü hədəf aldığı vurğulanıb.

Bundan əlavə, ABŞ-ın Maliyyə Nazirliyi Venesuelaya İran neftinin satışı ilə məşğul olan 4 nəfərə də sanksiya tətbiq ediləcəyini bildirib.

ABŞ-ın Maliyyə naziri Stiven Mnuçin mövzu ilə əlaqədar açıqlamasında İran rejiminin İran İnqilab Keşikçiləri Ordusunun tabeliyindəki Qüds Gücünün sabitliyi pozan fəaliyyətlərini maliyyələşdirmək üçün neft sektorundan istifadə etdiyini deyib. S.Mnuçin bildirib: “İran rejimi İran xalqının ehtiyaclarına məhəl qoymadan terror təşkilatlarına və nüvə proqramına dəstəyi daha üstün tutur”.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.