ELM VƏ TƏHSİL
Müsabiqə qalibləri ilə onlayn görüş keçirilib
Bakı, 22 yanvar, AZƏRTAC
Bakı Şəhəri üzrə Təhsil İdarəsi (BŞTİ) tərəfindən “Sevimli nəğmələr” və “Oxu və əylən!” müsabiqələrinin yekunlarına həsr olunmuş onlayn görüş keçirilib.
Bu barədə AZƏRTAC-a Təhsil İdarəsindən məlumat verilib. Bildirilib ki, görüşdə BŞTİ-nin müdiri Mehriban Vəliyeva, Təhsil Nazirliyinin Məktəbdənkənar fəaliyyətin təşkili şöbəsinin müdiri Elnur Əliyev, idarənin müvafiq struktur bölmə rəhbərləri, məktəb direktorları və hər iki müsabiqənin qalibləri iştirak ediblər.
Müsabiqə iştirakçılarını təbrik edən Mehriban Vəliyeva zəngin milli-mənəvi dəyərlərə malik olan Azərbaycan xalqının bu dəyərləri sədaqətlə qoruması, əsrlərlə yaşatması və inkişaf etdirməsindən danışıb.
İdarə müdiri “Sevimli nəğmələr” və “Oxu və əylən!” müsabiqələrinin təşkil olunmasının əsas hədəfinin şagirdləri ölkəmizin milli-mənəvi dəyərləri barədə daha ətraflı məlumatlandırmaq, gənc nəsli milli-mənəvi dəyərlərimizə qayıdış və milli oyanış ruhunda tərbiyə etmək və məktəblilərin asudə vaxtlarını səmərəli təşkil etməkdən ibarət olduğunu söyləyib. Müsabiqələrin əhəmiyyəti barədə danışan idarə müdiri qalib gəlmiş şagirdlərin fəallığını yüksək dəyərləndirib və onlara uğurlar arzulayıb.
Təhsil Nazirliyinin Məktəbdənkənar fəaliyyətin təşkili şöbəsinin müdiri Elnur Əliyev istedadlı gənclərin vaxtında aşkara çıxarılmasında və onların ictimaiyyətə tanıdılmasında bu cür yaradıcılıq müsabiqələrinin böyük rolu olduğunu bildirib. O qeyd edib ki, mövcud epidemioloji vəziyyətdə belə müsabiqələrin keçirilməsi şagirdlərin ev şəraitində asudə vaxtlarını səmərəli təşkil etməkləri baxımından yüksək qiymətləndirilir.
Daha sonra hər iki müsabiqənin qaliblərindən bəhs edən videoçarx nümayiş olunub.
Görüş ədəbi-bədii kompozisiyalar ilə davam edib.
Qeyd edək ki, “Oxu və əylən” müsabiqəsinin nəticələrinə görə, Bakı şəhəri 29 nömrəli tam orta məktəbin şagirdi Zülfiyyə İsayeva, 12 nömrəli tam orta məktəbin şagirdi Nigar Bəşirova, 236 nömrəli tam orta məktəbin şagirdi Nuray İbadlı I, 142 nömrəli tam orta məktəbin şagirdi Tural Zeynallı, 206 nömrəli tam orta məktəbin şagirdi Gülər Qurbanlı və 234 nömrəli tam orta məktəbin şagirdi Asiya Adilzadə II, 78 nömrəli tam orta məktəbin şagirdi Aylin Məmmədli, 239 nömrəli tam orta məktəbin şagirdi Nərgiz Qasımzadə və 244 nömrəli tam orta məktəbin şagirdi Xədicə İsmayılzadə isə III yerə layiq görülüblər. Bakı şəhəri 140 nömrəli tam orta məktəbin şagirdi Nisə Məmmədova, 256 nömrəli tam orta məktəbin şagirdi Nərgiz Əliyeva və 274 nömrəli tam orta məktəbin şagirdi Nuray Vaqifzadə həvəsləndirici yeri tutublar.
“Sevimli nəğmələr” uşaq mahnı müsabiqəsinin nəticələrinə əsasən, 74 nömrəli tam orta məktəbin şagirdi Fəqan Xəlilli I, 288 nömrəli tam orta məktəbin şagirdi Fatimə Şükürzadə II, 220 nömrəli məktəb-liseyin şagirdi Zəhra Abdulalı isə III yerin sahibi olub. Müsabiqədə fərqlənən 15 iştirakçı isə tərifnaməyə layiq görülüb.
Hər iki müsabiqənin qaliblərinə BŞTİ tərəfindən diplom və hədiyyələr təqdim olunacaq.