REGİONLAR
Cənub bölgəsində şəhidlərimizin xatirəsi ehtiramla anılıb
Astara, 27 sentyabr, Bağır Əliyev, AZƏRTAC
Sentyabrın 27-də Azərbaycanda haqq və ədalətin bərpa edildiyi günün - Vətən müharibəsinin başlanmasının birinci ildönümü tamam olur. 30 il idi ki, düşmən tapdağında olan torpaqlarımızın azad ediləcəyi günü səbirsizliklə gözləyirdik. Nəhayət ötən ilin payızında qisas günü yetişdi. Azərbaycan Respublikasının Prezidenti, Müzəffər Ali Baş Komandan İlham Əliyevin rəhbərliyi ilə 2020-ci il sentyabrın 27-də şanlı Azərbaycan Ordusu əks-hücum əməliyyatına başladı. Rəşadətli Azərbaycan Ordusunun əsgər və zabitləri təcavüzkar, işğalçı Ermənistan ordusunun uzun illər ərzində qurduğu istehkamları yarıb keçərək torpaqlarımızı qanları və canları bahasına işğaldan azad etdilər.
AZƏRTAC-ın bölgə müxbiri xəbər verir ki, Azərbaycan Respublikası Prezidentinin müvafiq Sərəncamı ilə qeyd olunan 27 sentyabr - Anım Günündə ölkəmizin bütün bölgələrində olduğu kimi, cənub bölgəsində də Vətən müharibəsi şəhidlərinin xatirəsi ehtiramla anılıb.
Astara şəhərində yeni salınmış “Şəhidlər” xatirə kompleksində Anım Gününə həsr olunmuş tədbirdə rayon icra hakimiyyətinin başçısı Qəzənfər Ağayev, Milli Məclisin deputatı Rəşad Mahmudov, şəhid ailələrinin üzvləri, qazilər, müharibə iştirakçıları, idarə, müəssisə və təşkilatların kollektivləri, qeyri-hökumət təşkilatlarının və ictimaiyyətin nümayəndələri iştirak ediblər.
Tədbir iştirakçıları abidə-kompleksinin önünə gül dəstələri düzərək, Azərbaycanın suverenliyi və ərazi bütövlüyü uğrunda şəhid olanların xatirəsini ehtiramla yad ediblər.
Anım mərasimində qeyd olunub ki, Azərbaycan xalqı şanlı qəhrəmanlıq salnaməsi yazaraq, özünün qalib xalq olduğunu bütün dünyaya sübut etdi və düşmən üzərində tarixi Zəfər çaldı. Bu Qələbə ilə xalqımızın 30 illik həsrətinə son qoyuldu. Şəhidlərimizin qanı yerdə qalmadı.
Diqqətə çatdırılıb ki, Vətən müharibəsində Astara rayonundan 600-ə qədər gənc iştirak edib. Onlardan 41 nəfər şəhid olub, 138 nəfər yaralanıb. Ümumilikdə Birinci və İkinci Qarabağ müharibələrində Astaranın 124 nəfər cəsur, mərd oğlu şəhidlik zirvəsinə ucalıb.
Anım mərasimində qəhrəman şəhidlərimiz polkovnik-leytenant Nail Orucovun övladı İbrahim Oruczadə, Nurlan Rəhimovun övladı Əlövsət Rəhimli, Samiq Rəhmanovun övladları Aylin və Fədayə Rəhmanzadə bacılarının şəhidlər haqqında söylədiyi şeirlər tədbir iştirakçılarına duyğulu anlar yaşadıb.
Vətən müharibəsinin şəhidi, mayor Kamran Fərəcovun həyat yoldaşı Nuranə Fərəcova və qazi Coşqun Söhübzadə tədbirdə çıxış edərək, ailələrinə göstərilən diqqət və qayğıya görə dövlətimizin başçısına minnətdarlığını bildiriblər.
Astara Rayon İcra Hakimiyyətinin başçısı Qəzənfər Ağayev və Milli Məclisin deputatı Rəşad Mahmudov şəhid ailələrinin üzvləri və qazilərlə görüşərək qayğı və problemləri ilə maraqlanıblar.
Həmin gün rayon rəhbərliyi Səncərədi kəndində şəhidlərin xatirə kompleksini ziyarət edib, Vətən müharibəsinin şəhidləri Qeybiyev Arif İsmail oğlu, Hüseynov Şahnur Şahin oğlu, Kazımov İlkin Xanməmməd oğlu və Ağayev Zülfi Ağalı oğlunun il mərasimlərinə qatılıblar.
Anım Günündə, həmçinin şəhər ərazisində 520 ədəd ağac əkilib, Astara park-bulvar kompleksində vətənpərvərlik marşlarının sədaları altında gənclərin yürüşü keçirilib. Astaradan olan 41 nəfər Vətən müharibəsi şəhidinin xatirəsinə səmaya 41 göyərçin buraxılıb.
Ölkəmizin hər yerində olduğu kimi, Astara rayonunda da saat 12:00-da şəhidlərin əziz xatirəsi bir dəqiqəlik sükutla yad edilib.
X X X
Sentyabrın 27-də Lənkəran rayonunda da 44 günlük Vətən müharibəsinin başlanmasının birinci ildönümünə və şəhidlərin əziz xatirəsinə həsr olunmuş anım mərasimləri keçirilib.
Anım mərasimləri əsaslı tikinti-bərpa işlərindən sonra istifadəyə verilən “Şəhidlər” abidə-kompleksi önündən başlayıb.
Lənkəran Şəhər İcra Hakimiyyətinin başçısı Taleh Qaraşov, Milli Məclisin deputatı Ziyafət Əsgərov, hüquq-mühafizə orqanlarının, idarə və təşkilatların rəhbər işçiləri, əmək kollektivlərinin, ictimaiyyətin nümayəndələri şəhidlərin məzarları önünə tər çiçəklər düzərək xatirələrini ehtiramla yad ediblər.
Rayon rəhbərliyi şəhid ailələri ilə görüşüb, problemləri ilə maraqlanıb.
İcra başçısı döyüşlərin başladığı gündən hər bir lənkəranlının müsəlləh əsgərə çevrilərək Vətən uğrunda şəhidlik zirvəsinə yüksəlməyə hazır olduğunu vurğulayıb və elə müharibənin ilk saatlarında yüzlərlə gəncin Səfərbərlik və Hərbi Xidmətə Çağırış üzrə Dövlət Xidmətinin rayon şöbəsinə gələrək könüllü olaraq döyüş bölgəsinə göndərilmələrini təkidlə tələb etdiklərini xatırladıb. Döyüşə gedən lənkəranlı gənclərdən 66 nəfərin qəhrəmancasına həlak olduğunu, bir çoxunun yaralandığını qeyd edən T.Qaraşov onların şücaətinin hər bir gənc üçün misilsiz vətənsevərlik nümunəsi olduğunu, torpaqlarımızın azadlığı uğrunda şəhidlik zirvəsinə ucalmış əsgər və zabitlərimizin xatirəsinin həmişə ehtiramla yad ediləcəyini söyləyib.
Şəhid ataları Kamran Kazımov, Layim Veysəlov, şəhidin həyat yoldaşı Rəna Bayramova, şəhid övladları Emiliya Qurbanova, Rüqəyya Quliyeva və başqaları çıxışlarında Vətən müharibəsində qəhrəmancasına həlak olan əzizləri ilə, eləcə də bütün şəhidlərimizlə qürur duyduqlarını bildiriblər. Onlar şəhidlərin Vətən qarşısında xidmətlərinin yüksək qiymətləndirilməsinə və şəhid ailələrinə göstərilən diqqət və qayğıya görə Prezident İlham Əliyevə minnətdarlıqlarını ifadə ediblər.
Anım tədbirində məktəblilərin ifasında Vətən müharibəsinə və şəhidlərə həsr olunmuş ədəbi-bədii kompozisiya nümayiş etdirilib.
Həmin gün rayonun məscid və ibadətgahlarda şəhidlərin ruhuna dualar oxunub, Şəhidlər xiyabanının ərazisində və Heydər Əliyev prospektində 1000-ə yaxın həmişəyaşıl ağac əkilib.
Saat 12:00-da şəhidlərin xatirəsi bir dəqiqəlik sükutla yad edilib.
Anım günü ilə əlaqədar Lənkərandakı Heydər Əliyev Mərkəzində, Lənkəran Dövlət Universitetində, təhsil, səhiyyə, mədəniyyət müəssisələrində və müxtəlif təşkilatlarda silsilə tədbirlər davam etdirilib.
Eyni zamanda, Lənkəran Dövlət Dram Teatrının yaradıcı kollektivi rəşadətli Azərbaycan Ordusunun cəbhədə qazandığı qələbələri, əsgərlərimizin şücaətini, xalqımızın vətənpərvərlik qüdrətini vəsf edən “Zəfərin mübarək, Azərbaycan!” adlı audioçarx formatında ədəbi-bədii və musiqili kompozisiyanın təqdimatını keçirib.
Audioçarx səsgücləndirici qurğular vasitəsilə teatrda, Lənkəran şəhərinin Şəhidlər xiyabanında, şəhərin ayrı-ayrı ərazilərində səsləndirilib.
Teatrın aktyorlarının ifasında audiolentə alınmış “İgid əsgər, möhkəm dayan!”, “Əziz, doğma Şuşamız”, “Qarabağ bizimdir!”, “Qarabağ Azərbaycandır”, “Müzəffər Ali Baş Komandan” və digər bu kimi başlıqlı şeirlər, mahnılar, musiqi nömrələri dinləyicilər tərəfindən rəğbətlə qarşılanıb.
X X X
Anım Günü ilə bağlı Lerik, Masallı, Yardımlı və Cəlilabad rayonlarında da Vətən müharibəsinin başlanmasının birinci ildönümünə həsr olunmuş silsilə tədbirlər keçirilib.
Mərasimlərdə rayonun rəhbər işçiləri, hüquq-mühafizə orqanlarının, idarə, müəssisə və təşkilatların nümayəndələri, şəhid ailələrinin üzvləri, qazilər, müharibə iştirakçıları, ictimaiyyətin nümayəndələri iştirak ediblər.