CƏMİYYƏT


Könüllü gənclərimizin vətənpərvərlik nümunəsi – Vətən müharibəsi şəhidi Səmural Fətəliyev

Bakı, 5 dekabr, AZƏRTAC

Səmural xalqına, Vətəninə fayda vermək məqsədilə ilk fəaliyyətinə könüllü kimi başladı. Könüllülüyün prinsiplərinə sadiq qalaraq vəzifəsinin öhdəsindən layiqincə gəldi. Onun könüllü kimi son sınağı Vətən müharibəsi oldu. Bu dəfə missiyasını hər zamankından da yüksək səviyyədə tamamladı. Ən uca məqamı - şəhidlik zirvəsini fəth edərək adını tarixə yazdırmağı bacardı.

Şəhidin qardaşı Təhməz Fətəliyev AZƏRTAC-a müsahibəsində qardaşı haqqında böyük qürurla danışır. Nə vaxt Səmuralın adı çəkilirsə, kədərdən daha çox fəxarət hiss etdiyini və qardaşı barəsində danışmaqdan yorulmadığını bildirir: “Biz iki qardaş idik. Səmural məndən üç yaş böyük idi. O, hər işi təmənnasız görməkdən, Vətənə, millətə faydalı olmaqdan zövq alırdı. Könüllülük fəaliyyətini də böyük şövqlə yerinə yetirirdi. Tale elə gətirdi ki, həqiqi hərbi xidməti Səmuralla bir yerdə keçdim. Orada da necə tələbkar və məsuliyyətli olduğuna şahidlik etdim. Bir işin ki, içində Vətəni müdafiə, Vətənə xidmət var idisə, Səmural hər zaman əlindən gələnin ən yaxşısını etməyə, belə işlərdə daim öndə olmağa çalışırdı. Ötən il Tovuz döyüşləri zamanı general-mayor Polad Həşimov, polkovnik İlqar Mirzəyev və digər hərbçilərimizin şəhid olmaları hamımızı dərindən sarsıtmışdı. Lakin Səmural bundan hədsiz hiddətlənmişdi. Onsuz da düşmənin xalqımızın başına gətirdiyi müsibətlərə görə onun qəzəbi dolub-daşırdı. Bu hadisə isə onda intiqam hissini daha da alovlandırdı. Həmin vaxt minlərlə gənc ön cəbhəyə getməyə can atır, könüllü qeydiyyatdan keçirdi. Səmural da bizdən xəbərsiz adını siyahıya yazdıranlar sırasında olub. Sentyabrın 27-də Vətən müharibəsi başlayanda Səmural ilk gündən döyüş meydanına atılanlardan idi. Müharibəyə gedən günü onun videosunu çəkmişdim. Sevinə-sevinə gedirdi. Gedərkən vidalaşırmış kimi əlini yellədi və bu, bizim sonuncu görüşümüz oldu...”.

Səmuralın kəşfiyyat bölüyünün qrup komandiri kimi, Füzuli istiqamətində gedən döyüşlərdə fəal iştirak etdiyini, çətin tapşırıqların öhdəsindən məharətlə gəldiyini vurğulayan Təhməz Fətəliyev bildirib: “Onunla mütəmadi qaydada əlaqə yarada bilirdik. Zəng vura bilməyəndə mesaj yazır, yaxşı olduğunu bildirirdi. Hər dəfə danışanda da deyirdi: “Narahat olmayın, əksinə, sevinin. Biz irəliləyirik. Həm qisasımızı, həm də torpaqlarımızı alırıq”. Onunla sonuncu danışığımız oktyabrın 4-də oldu. Onda da yenə qələbə sevincini bizimlə bölüşdü. Ondan bir gün əvvəl Suqovuşan, həmin gün isə Cəbrayıl azad edilmişdi. Yenə də narahat olmamağımızı tapşırıb sağollaşdı. Bundan sonra Səmuraldan nə zəng, nə də mesaj gəlmədi. Narahat olmağa başladıq. Oktyabrın 8-də bizə Səmuralın şəhid olması xəbəri verildi. Bizimlə sonuncu danışığının ertəsi günü şəhid olmuşdu. Qardaşım Füzuli rayonu uğrunda gedən döyüşlər zamanı ağır artilleriya atəşinə məruz qalaraq şəhadətə yüksəlib. Oktyabrın 9-da Səmuralı kəndimizdə dəfn etdik”.

Qardaş itkisi ifadə edilməyəcək qədər ağırdır. Səmural kimi cəsur, vətənpərvər qardaş itkisinin ağırlığından danışan Təhməz Vəliyev bildirib: “Səmural təkcə qardaşım deyil, dostum, sirdaşım, arxa-dayağım idi. O qədər cəsarətli, ürəyitəmiz, məsuliyyətli idi ki, Səmuralı tanıyan hər kəs onun itkisinə üzülməklə yanaşı, həm də onunla fəxr edirlər. Təsəllimiz torpaqlarımızın, xüsusilə də qardaşımın şəhid olduğu Füzulinin azad edilməsidir. Çox istərdim ki, qardaşımın uğrunda son damla qanına qədər döyüşdüyü, şəhid olduğu ərazilərə gedim. Evimizin girəcəyində qardaşımın xatirə guşəsini hazırlamışam. Evə daxil olanda bizi sanki Səmural qarşılayır. O, hər zaman bizimlə olacaq. Bu il Quba rayonunun Əlibəyqışlaq kəndinin sakinləri Səmural və kəndin digər şəhidlərin xatirəsinə park salıblar. Parkın açılışı qardaşımın doğum günündə - martın 13-də keçirildi. Qardaşım və ümumiyyətlə bütün şəhidlərimizin xatirəsini əziz tutan, onlara hörmət edən hər kəsə minnətdaram. Xalqımızın şəhidlərə, qazilərə ehtiramı, şəhid ailələrinə göstərilən dəstək bizim üçün təsəllidir. Səmural böyük qardaş kimi nəinki mənim üçün, yetişən nəsil üçün də vətənpərvərlik, şərəf nümunəsidir. Amalı Vətənə xidmət olan Səmural elə Vətən yolunda da canından keçdi. Həyatımın sonuna kimi qardaşımı örnək alıb yaşayacaq, onun ləyaqətli həyat yolunu gələcək nəsillərə aşılayacağam. Mən Səmuralı son nəfəsimə kimi yaşadacağam”.

Qeyd edək ki, Vətən müharibəsi şəhidi Səmural Ayaz oğlu Fətəliyev 1997-ci il martın 13-də Quba rayonunun Əlibəyqışlaq kəndində anadan olub. Kiçik yaşlarından taekvondo ilə məşğul olan Səmural 6 yaşında ikən Qusarda keçirilən yarışda üçüncü yeri tutub. 2003-2012-ci illərdə Quba rayon Əlibəyqışlaq kənd Musa Qonaqov adına tam orta məktəbdə, 2012-2014-cü illərdə Quba rayon Azad Məmmədov adına 2 saylı liseydə təhsil alıb. Səmural 2014-2018-ci ildə Azərbaycan Memarlıq və İnşaat Universitetinin Tikinti-iqtisad fakültəsinin “Sənayenin təşkili və idarə edilməsi” ixtisası üzrə ali təhsil alıb.

Səmural könüllülük fəaliyyətinə hələ tələbə ikən, yəni, 2016-cı ilin sonlarından başlayıb. Belə ki, o, 2016-cı il dekabrın 20-dən 2017-ci ilin fevralın 20-dək Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin 1 saylı Bakı “ASAN xidmət” Mərkəzində könüllü kimi fəaliyyət göstərib. Fəaliyyətinin nəticəsi olaraq 99,44 bal toplayıb, müsbət xasiyyətnamə və birinci dərəcəli şəhadətnamə ilə təltif edilib. Bundan əlavə, o, 2017-ci ildə ölkəmizdə keçirilən IV İslam Həmrəyliyi Oyunlarında da könüllü olaraq fəaliyyət göstərib.

Səmural 2018-2019-cu illərdə müddətli həqiqi hərbi xidmətdə olub. Mingəçevirdə yerləşən "N" saylı hərbi hissədə xidmət edən Səmural xidməti dövründə fərqləndiyi üçün manqa komandiri təyin olunub. Hərbi xidmətini fəxri fərmanlar və fərqlənmə ilə başa vurub. 2019-cu ilin oktyabr ayında SOCAR-ın Təhlükəsizlik İdarəsində əmək fəaliyyətinə başlayıb.

Vətən müharibəsi başlayanda Səmural ön cəbhəyə yollanıb, kəşfiyyat bölüyü ilə birlikdə Füzuli uğrunda gedən döyüşlərdə iştirak edib. Oktyabrın 5-də kəşfiyyat bölüyü Füzuli rayonunun Yuxarı Seyidəhmədli və Qorqan kəndləri arasında düşmənin ağır artilleriya atəşinə məruz qalıb. Qızğın döyüş zamanı Səmural və bir neçə silahdaşı qəhrəmancasına şəhid olub. Vətən müharibəsi şəhidi Səmural Fətəliyev 2020-ci il oktyabrın 9-da Quba rayon Əlibəyqışlaq kənd məzarlığında torpağa tapşırılıb.

Ölümündən sonra Prezident İlham Əliyevin sərəncamları ilə “Vətən uğrunda”, “Füzulinin azad olunmasına görə” medalları ilə təltif olunub.

Dekabrın 5-i Beynəlxalq Könüllülər Günüdür. Bu gün məhz Səmural Fətəliyev kimi Vətənin müdafiəsi naminə döyüşlərə könüllü yollanan, son damla qanına kimi döyüşən, canını, qanını fəda edən, Zəfər qazanan savaşçı kimi ya əlində bayraqla geri dönənlərin, ya da bayrağa bükülüb gələnlərin, şəhidlik zirvəsini könüllü fəth edənlərin günüdür. Könüllü deyiləndə ilk ağıla gələn ərazi bütövlüyümüz uğrunda düşmənlə döyüşmək üçün ayaqlanan, ön cəbhəyə axışan Azərbaycan gəncləri gəlir. Buna görə də ötən il 44 günlük Vətən müharibəsinin qalibinin də könüllülər ordusu olduğunu desək yanılmarıq. Könüllülük missiyasını ən şərəfli və ləyaqətli şəkildə yerinə yetirənlər də şəhid və qazilərimiz oldular. Hər birimiz onların açdığı yollarla irəliləməli, könüllü və təmənnasız xidmətlərlə ölkəmizə və xalqımıza fayda verməyi bacarmalıyıq.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.