Ağdam, 11 iyun, Tahir Ağaməmmədov, AZƏRTAC

1993-cü il iyunun 15-i Azərbaycan xalqı üçün böyük ictimai, siyasi və tarixi əhəmiyyətə malik bir gündür. Həmin gün hakimiyyətə qayıdan ulu öndər Heydər Əliyevin müdrik siyasəti nəticəsində ölkə siyasi böhrandan, parçalanmaq təhlükəsindən xilas olub, sabitlik və inkişaf yoluna qədəm qoyub.

AZƏRTAC-ın bölgə müxbiri xəbər verir ki, bu fikir Kürdəmir Regional Mədəniyyət İdarəsinin tabeliyində fəaliyyət göstərən Beyləqan rayon Heydər Əliyev Mərkəzində 15 İyun - Milli Qurtuluş Gününə həsr olunmuş “Milli qurtuluşumuzun zəfər yürüşü” adlı dəyirmi masada səsləndirilib. Tədbirdə çıxış edən Beyləqan rayon Heydər Əliyev Mərkəzinin direktoru Xəyalə Kərimova Milli Qurtuluş Gününün tarixi əhəmiyyətindən danışıb. Bildirib ki, Azərbaycan xalqının taleyində böyük əhəmiyyət daşıyan günlərdən ən önəmlisi tariximizə qızıl hərflərlə yazılmış Milli Qurtuluş Günüdür. Həmin gün Azərbaycan xalqı üçün sadəcə təqvim bayramı deyil, böyük ictimai, siyasi və tarixi əhəmiyyətə malik bir gündür. İyunun 15-i xalqımız üçün əsl qurtuluş tarixidir. Bu tarixi yaradan isə Azərbaycanın müstəqilliyinin qorunub saxlanmasında, möhkəmlənməsində, inkişafında müstəsna rol oynayan, daim xalqına arxalanan və xalqına arxa, dayaq olan bir insan - Heydər Əliyevdir.

Kürdəmir Regional Mədəniyyət İdarəsinin məsləhətçisi Nazim Çıraq, Beyləqan rayon Tarix diyarşünaslıq muzeyinin direktoru Mehriban İsgəndərova, Soltanbud kənd tam orta məktəbin tarix müəllimi Məhəbbət Məmmədov, Beyləqan rayon Mədəniyyət Mərkəzinin idman metodisti Sahib Nəsibov və başqaları çıxışlarında ötən əsrin 1990-cı illərin əvvəllərində respublikamızda baş verən ictimai-siyasi prosesləri geniş təhlil edib, görkəmli dövlət xadimi Heydər Əliyevin 1993-cü il iyunun 15-də Azərbaycanda hakimiyyətə qayıdışının tarixi əhəmiyyətindən danışıblar. Bildirilib ki, Azərbaycan torpaqlarının işğala məruz qaldığı, ölkənin parçalanmaq təhlükəsi ilə üzləşdiyi, vətəndaş qarşıdurmasının yarandığı bir vaxtda ümummilli lider Heydər Əliyev xalqın təkidli tələbi ilə hakimiyyətə qayıdaraq qarşıdurmaya, siyasi hərc-mərcliyə son qoyub, respublikada siyasi sabitliyə nail olunub. Həmin tarixdən sonra ölkənin ictimai-siyasi, sosial-iqtisadi və mədəni həyatında əsaslı dönüş başlanıb, əmin-amanlıq bərqərar olub.

Qeyd edilib ki, müstəqil Azərbaycan Respublikası bu gün Ulu Öndərin layiqli davamçısı Prezident İlham Əliyevin rəhbərliyi ilə uğurla inkişaf edir. Azərbaycan xalqı xoşbəxt gələcəyə doğru qətiyyətlə addımlayır, ölkəmiz siyasi və iqtisadi cəhətdən qüdrətlənir. Qədirbilən xalqımız böyük xilaskarının xidmətlərini unutmur və hər il Milli Qurtuluş Gününü böyük coşqu ilə qeyd edir.