ELM VƏ TƏHSİL
2021-2022-ci tədris ili Bakı məktəbliləri üçün bir sıra nailiyyətlərlə yaddaqalan oldu
Bakı, 17 iyun, AZƏRTAC
2021-2022-ci tədris ili Bakı Şəhəri üzrə Təhsil İdarəsi (BŞTİ) üçün tədrisdə keyfiyyət və davamlılığı təmin etmək, yeni dövrün çağırışlarından irəli gələn tələbləri yerinə yetirmək istiqamətində görülən işlər, həmçinin bir sıra nailiyyətlər, yeniliklərlə zəngin təhsil ili kimi yaddaqalan oldu.
Bu barədə AZƏRTAC-a BŞTİ-dən məlumat verilib. Bildirilib ki, ümumi təhsilin tam orta təhsil səviyyəsində təmayülləşmənin miqyası genişləndirilib. BŞTİ-nin tabeliyindəki 180 məktəbdə təşkil edilən 722 təmayül sinifdə 17 min 241 şagird təhsil alıb. BŞTİ tərəfindən idarənin tabeliyindəki təhsil müəssisələrindəki təmayül siniflər haqqında məlumatlar toplanılıb və təhlil edilib. Ümumi təhsildə keyfiyyətin artırılmasına xidmət edən təmayül siniflərə şagirdlərin marağı ilbəil artmaqdadır.
Bakı şəhəri üzrə 5 ümumi təhsil müəssisəsində 112 şagird inklüziv təhsilə cəlb edilib. İnklüziv təhsil sağlamlıq imkanları qismən məhdud uşaqlarla sağlam uşaqların eyni sinifdə təhsil almasına imkan yaradır. Layihə həmin uşaqların cəmiyyətə daha rahat inteqrasiyasına nail olmaq məqsədlərinə xidmət edir.
Paytaxt üzrə 178 məktəbdə 489 şagird fərdi təhsilə cəlb edilib. Qeyd edək ki, fərdi təhsil müxtəlif səbəblərdən uzun müddət təhsildən kənarda qalmış şəxslərin fərdi qaydada təhsil almalarına şərait yaradır.
BŞTİ-nin tabeliyindəki 125 nömrəli tam orta məktəbin şagirdi Nigar Ağazadə və 286 nömrəli tam orta məktəbin şagirdi Nəcməddin Orucov martın 5-6-da keçirilmiş buraxılış imtahanlarında (XI sinif üzrə) maksimum nəticə göstərərək 300 bal toplayıblar.
Paytaxtın Səbail rayonu üzrə ümumi təhsil müəssisələrinin II-IX sinif şagirdlərinin iştirak etdiyi diaqnostik qiymətləndirmədə 11 min 424 şagird iştirak edib. Daha sonra diaqnostik qiymətləndirmə materialları BŞTİ-nin tabeliyindəki bütün ümumi təhsil müəssisələrinə göndərilib. Yekun nəticələrlə bağlı inkişaf planları təhsil müəssisələrinə təqdim olunub.
Bakının ümumi təhsil müəssisələrinin IX siniflərinin şagirdləri üçün buraxılış imtahanı üzrə 3 monitorinq təşkil olunub. BŞTİ tərəfindən keçirilən monitorinqin əsas məqsədi şagirdlərin təlim nəticələrini təhlil etmək, bu istiqamətdə müvafiq tədbirlər görmək, buraxılış imtahanı fənn bloku üzrə tədrisin keyfiyyətini daha da artırmaqdan ibarətdir. Monitorinq zamanı şagirdlərin təlim dili, riyaziyyat, xarici dil fənləri üzrə müvafiq bilikləri yoxlanılıb.
BŞTİ tərəfindən V-IX siniflər üzrə diaqnostik qiymətləndirmə keçirilib və qiymətləndirmənin təhlilləri aparılıb. Riyaziyyat, xarici dil və tədris dili üzrə keçirilən diaqnostik qiymətləndirmənin əsas məqsədi ötən tədris ilində ayrı-ayrı fənlər üzrə proqram materiallarının mənimsənilmə göstəricilərinin müəyyənləşdirilməsindən ibarətdir.
2021-2022-ci tədris ilində BŞTİ-nin tabeliyində olan təhsil müəssisələrinin V-VIII siniflərinin tədrisi digər dildə aparılan bölmələrində təhsil alan şagirdlərin Azərbaycan dili fənni üzrə bilik və bacarıqlarının monitorinqi aparılıb və nəticələri təhlil edilib.
Cari tədris ilində paytaxtdakı 15 təhsil müəssisəsində “Peşə təmayüllü siniflərin təşkili” layihəsi tətbiq olunub. Belə ki, BŞTİ-nin tabeliyindəki 64, 97, 117, 120, 166, 179, 208, 213, 234, 265, 274, 293, 301, 302, 321 nömrəli tam orta məktəblərdə fəaliyyət göstərən peşə təmayüllü siniflərin yaradılmasının əsas məqsədi ümumi təhsil bazasında şagirdlərin müxtəlif peşələr üzrə ilkin bilik və bacarıqlara yiyələnməsini təmin etmək, peşə ixtisasları barədə məlumatlandırılmaqla əmək bazarına, eləcə də peşə təhsilinə hazırlanmasından ibarətdir.
Ümumi təhsilin hər hansı səviyyəsini vaхtından əvvəl bitirmək istəyən istedadlı şagirdlər üçün eksternat qaydasında imtahan keçirilib. Bir şagird ibtidai təhsil səviyyəsi üzrə eksternat imtahanlarında müvəffəqiyyət qazanıb.
Əvvəlki illərdə ümumi orta (IX) və tam orta (XI) təhsil səviyyələrini başa vura bilməyən şəxslər üçün təşkil olunan imtahanlara hər iki səviyyə üzrə ümumilikdə 719 nəfər qatılıb. Onlardan 517 nəfəri uğur qazanıb. Eksternat imtahanlarında ümumi orta təhsil səviyyəsi üzrə 140 nəfər, tam orta təhsil səviyyəsi üzrə 377 nəfər uğur qazanıb. Həmçinin, paytaxt məktəbliləri 2021-2022-ci tədris ilində ölkəmizi beynəlxalq arenada uğurla təmsil ediblər.
Eyni zamanda, 2021-2022-ci tədris ili ərzində paytaxt məktəbliləri idmanın müxtəlif növləri üzrə beynəlxalq və respublika yarışlarında 253 qızıl, 112 gümüş, 196 bürünc olmaqla, ümumilikdə 561 medal əldə ediblər. Belə ki, 82 nömrəli tam orta məktəbin şagirdi Kamran Kazımov Serbiyada keçirilən dünya çempionatında karate idman növü üzrə I yerə layiq görülüb. Dünya çempionu olan K.Kazımov bu qələbəsinə görə diplom, medal və kuboka layiq görülüb. 76 nömrəli tam orta məktəbin şagirdi Ruzanna Məmmədova Budapeştdə sərbəst güləş üzrə yeniyetmələr arasında keçirilən dünya çempionatında II yeri qazanıb. Türkiyədə keçirilən muay-tay idman növü üzrə Avropa çempionatında 283 nömrəli tam orta məktəbin şagirdi Xəyal Əliyev bütün rəqibləri üzərində qalib gələrək birinci yerə layiq görülüb. Xəyal Əliyev bu qələbəsinə görə qızıl medalla təltif olunub.
BŞTİ-nin tabeliyində fəaliyyət göstərən 4 nömrəli Uşaq-Gənclər İnkişaf Mərkəzinin dərnək üzvləri və rəhbərləri Türkiyədə keçirilən beynəlxalq uşaq festivalında iştirak ediblər. İzmir Karşıyaka bələdiyyəsi tərəfindən təşkil olunan festivalda mərkəzin “Uşaq xalq rəqsləri” dərnəyinin üzvləri milli rəqslərimizi və musiqi nömrələrimizi ifa edib, şeirlər səsləndiriblər. Azərbaycanlı şagirdlərin rəngarəng çıxışları maraqla qarşılanıb.