MƏDƏNİYYƏT


Xəzər rayonunda Novruz bayramı münasibətilə ümumrayon şənliyi keçirilib

Bakı, 19 mart, AZƏRTAC

Martın 19-da Xəzər rayonunun Mərdəkan qəsəbəsində yerləşən Heydər Əliyev adına istirahət parkında Novruz bayramı münasibətilə ümumrayon şənliyi keçirilib.

AZƏRTAC xəbər verir ki, bayram şənliyində Xəzər Rayon İcra Hakimiyyətinin (RİH) başçısı Elşən Salahov, RİH başçısının müavinləri və aparatın əməkdaşları, Milli Məclisin deputatı Soltan Məmmədov, YAP Xəzər Rayon Təşkilatının sədri Namiq Əhmədov, Xəzər İnkişaf Fondunun rəhbəri Elmar Mədətov, Xəzər rayonunun hüquq-mühafizə orqanlarının rəhbərləri, idarə, müəssisə və təşkilat rəhbərləri, şəhid ailələri, qazilər və ictimaiyyət nümayəndələri iştirak ediblər.

Tədbir iştirakçıları əvvəlcə xalqımızın qədim ənənələrini, dəyərlərini, mətbəxini, məişətini əks etdirən pavilyonlarla, həmçinin Xəzər rayonu ərazisində fəaliyyət göstərən məktəbəqədər və orta ümumtəhsil müəssisələrindən gələn özfəaliyyət dərnəklərinin, rəqs və mahnı qruplarının folklor nümunələri və rayonda fəaliyyət göstərən idman məktəblərinin nümunəvi idman çıxışları ilə tanış olublar.

Tədbirdə çıxış edən Xəzər Rayon İcra Hakimiyyətinin başçısı Elşən Salahov şəhidlərimizin xatirəsini dərin ehtiramla yad edərək şəhid ailələrini, torpaqlarımızın keşiyində dayanan əsgər və zabitləri, rayon ictimaiyyətini Novruz bayramı münasibətilə təbrik edib, Prezident İlham Əliyevin Ümummilli Liderin vəsiyyətini və Azərbaycan xalqının arzularını reallaşdıraraq özünün rəhbərliyi altında müzəffər Azərbaycan Ordusunun doğma torpaqlarımızı işğaldan azad etdiyini və həmin ərazilərdə böyük coşqu ilə Novruz bayramının qeyd edildiyini vurğulayıb.

Daha sonra Milli Məclisin deputatı Soltan Məmmədov və Vətən Müharibəsi Qəhrəmanı Elçin Mansurovun anası Məleykə xanım Məcidova çıxışlarında ölkə rəhbərliyi səviyyəsində milli-mənəvi dəyərlərə göstərilən dövlət qayğısını xüsusi vurğulayıb, xalqımıza firavanlıq, ölkəmizə sülh və əmin-amanlıq arzulayıblar.

Tədbirin ikinci hissəsi rayon rəhbərliyinin və qonaqların iştirakı ilə Novruz atributları ilə bəzədilən Heydər Əliyev adına istirahət parkında möhtəşəm konsert proqramı ilə davam etdirilib.

Sonda Rayon İcra Hakimiyyətinin başçısı Elşən Salahov şəhid ailələri və qazilərlə çay süfrəsi arxasında görüşərək onların problemləri ilə maraqlanıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.