QAN YADDAŞI


20 Yanvar Azərbaycanın müasir istiqlal tarixində yeni dövrün başlanğıcı oldu

Bakı, 20 yanvar AZƏRTAC

Azərbaycan xalqının qan yaddaşına əbədi həkk olunmuş 20 Yanvar hadisələrindən 31 il ötür. 1990-cı ilin yanvar hadisələri nə qədər faciəli olsa da, Azərbaycan xalqının iradəsini, milli azadlıq uğrunda mübarizə əzmini qıra bilmədi. Həmin gecə həlak olan Vətən oğulları Azərbaycanın tarixinə parlaq səhifə yazdılar, xalqın milli azadlığı, müstəqilliyi üçün yol açdılar. Şəhidlər xiyabanında uyuyan qəhrəman oğul və qızlarımızın məzarını ziyarət etmək hər birimizin borcudur.

Bu sözləri AZƏRTAC-a müsahibəsində yanvarın 20-də Şəhidlər xiyabanını ziyarətə gələn “Vikipediya” üzrə mütəxəssis, diaspor üzrə araşdırmaçı-ekspert Elnur Eltürk deyib. O bildirib ki, 20 Yanvar faciəsi ümumxalq hüznü olmaqla yanaşı, həm də Azərbaycan xalqının iradəsinin sarsılmazlığını, mətinliyini göstərib. 20 Yanvar Azərbaycanın müasir istiqlal tarixində yeni dövrün başlanğıcı, 44 günlük Vətən müharibəsində Qələbəmiz isə bu faciəyə ədalətli cavab oldu. Bu gün bütün şəhidlərimizin ruhu şaddır. Azərbaycan Silahlı Qüvvələrinin həyata keçirdiyi uğurlu hərbi əməliyyatlar nəticəsində Müzəffər Ali Baş Komandan İlham Əliyevin rəhbərliyi ilə rəşadətli ordumuz 30 ildən artıq erməni işğalı altında olan torpaqlarımızı düşməndən azad etdi. Müstəqillik uğrunda mübarizəmiz şanlı Qələbəmiz ilə başa çatdı, şəhidlərimizin qanı yerdə qalmadı. Azərbaycan xalqı və dövləti düşmən üzərində parlaq, inamlı Qələbə qazanmaqla öz gücünü dünyaya nümayiş etdirdi.

“Bu günə qədər Azərbaycan “Vikipediya” icması tərəfindən “Vikipediya”nın Azərbaycan dil bölməsində 20 Yanvar faciəsi və şəhidləri haqqında çoxlu məqalə yaradılıb və əsaslı redaktə olunub. “Vikipediya”nın Azərbaycan dili bölməsindəki “Qara Yanvar” məqaləsi 40-a yaxın dildə mövcuddur. Bu məqalələr 20 Yanvar faciəsinin gələcək nəsillərə çatdırılmasında zəngin informasiya mənbəyidir. Bu gün gənc nəsil öz qəhrəmanlarını tanımalı, onları heç vaxt unutmamalıdır. Ölkəmizin ərazi bütövlüyü və Vətənimizin müdafiəsi uğrunda canlarından keçərək şəhidlik zirvəsinə ucalmağı özlərinə ən böyük şərəf sayan oğullarımızı tanıtmaq isə hər birimizin vətəndaşlıq borcu olmalıdır”,- deyə E.Eltürk qeyd edib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.