QAN YADDAŞI
20 Yanvar faciəsinin 30-cu ildönümü Tehranda da qeyd olunub
Tehran, 20 yanvar, AZƏRTAC
Azərbaycanın İrandakı səfirliyində 20 Yanvar faciəsinin 30-cu ildönümü ilə əlaqədar tədbir keçirilib.
AZƏRTAC xəbər verir ki, tədbirdə səfir Bünyad Hüseynov çıxış edərək 1990-cı il yanvarın 20-də Azərbaycanda baş verən hadisələrin siyasi mahiyyəti haqqında geniş məlumat verib. O deyib ki, Azərbaycan xalqının müstəqillik uğrunda mübarizəsinin qarşısını almaq və Dağlıq Qarabağı Ermənistana birləşdirməyə nail olmaq məqsədilə sovet rəhbərləri 1990-cı il yanvarın 19-dan 20-nə keçən gecə Bakıya qoşun yeritdilər. Mülki əhalini qorxutmaq, xalqı müstəqillik uğrunda mübarizədən çəkindirmək üçün şəhərə yeridilən hərbi hissələr insanları amansızlıqla qətlə yetirdi. SSRİ rəhbərliyi demək olar ki, məqsədinə çatmışdı. Meydanlara toplaşıb etiraz edən xalq kütlələri dağıdılmış, siyasi rəhbərlik isə qorxudan xalqa qarşı törədilmiş terrora göz yummaq məcburiyyətində qalmışdı. Lakin ümummilli lider Heydər Əliyev Azərbaycan xalqına qarşı həyata keçirilən qırğına və ədalətsizliyə biganə qalmadı. Özünün və ailə üzvlərinin həyatının təhlükəyə düşməsindən çəkinməyən Ulu Öndər Moskvada Azərbaycanın daimi nümayəndəliyinə gedərək bəyanat verdi, SSRİ rəhbərlərini kəskin tənqid etdi. Heydər Əliyev 20 Yanvar hadisələrini xalqa qarşı törədilmiş terror adlandırdı. Məhz Heydər Əliyevin bəyanatından sonra dünya ictimaiyyəti Azərbaycanda baş verənlərdən xəbər tutdu.
Məsələnin siyasi aspektinə toxunan B.Hüseynov Dağlıq Qarabağ münaqişəsinin tarixinə nəzər salıb. Bildirib ki, ermənilər SSRİ dövründə də Dağlıq Qarabağı Ermənistana birləşdirmək niyyətində olublar. Lakin Azərbaycanın görkəmli oğlu Heydər Əliyev həm Azərbaycan Respublikasında, həm də SSRİ rəhbərliyində çalışdığı dövrlərdə ermənilərin bu istəklərinin qarşısını alıb.
20 Yanvar hadisələrdən az müddət sonra Kommunist Partiyasının sıralarını tərk etdiyini elan edən ulu öndər Heydər Əliyev xalqının dar günündə Azərbaycana, doğulduğu Naxçıvana qayıtmalı oldu. Burada xalq öz liderini hərarətlə qarşıladı və 1990-cı ilin sentyabrında keçirilən seçkilərdə o, Naxçıvan Ali Sovetinin Sədri seçdi. Ali Sovetin ilk sessiyasında Heydər Əliyevin təşəbbüsü ilə ilk dəfə olaraq Naxçıvan Muxtar Respublikasının Ali Məclisi 1990-cı il noyabrın 21-də Qanlı Yanvar hadisələrinə siyasi-hüquqi qiymət verdi. Azərbaycan xalqına qarşı törədilmiş bu siyasi-hərbi cinayətin cavabdehlərinin, günahkarlarının adları açıqlandı. 1993-cü ilin iyun ayında Ulu Öndər xalqın təkidli tələbi ilə siyasi hakimiyyətə qayıtdıqdan sonra Şəhidlər xiyabanının yenidən qurulması ilə bağlı Sərəncam verdi, burada möhtəşəm “Əbədi məşəl” abidə-kompleksi yaradıldı, “20 Yanvar Şəhidi” fəxri adı təsis edildi, 20 Yanvar hadisələrində sağlamlığını itirən əlillərin sosial müdafiəsi yaxşılaşdırıldı.
Bu gün Ümummilli Liderin siyasi kursunu uğurla davam etdirən Prezident İlham Əliyev Azərbaycanın iqtisadi inkişafına nail olaraq ordunu gücləndirib. Azərbaycan Ordusunun erməni təxribatına cavab olaraq hücuma keçib strateji əhəmiyyət daşıyan Lələtəpə yüksəkliyini azad etməsi nəticəsində Cocuq Mərcanlı kəndində həyat bərpa olunub. Bu, onu deməyə əsas verir ki, Dağlıq Qarabağ gec-tez işğaldan azad olunacaq.
Sonra səfirliyin müşaviri Abbas Cabbarov, səfirliyin birinci katibi və digərləri çıxış edərək 20 Yanvar faciəsini doğuran səbəblər və onun nəticələri haqqında danışıblar. Qeyd olunub ki, Azərbaycan Prezidenti İlham Əliyevin rəhbərliyi ilə ölkəmizin inkişafı və dünyada layiqli yerini tutması faciəni törədənlərə tutarlı cavabdır.
Tədbirdə qeyd edilib ki, 20 Yanvar hadisələri Azərbaycan xalqının tarixində qəhrəmanlıq salnaməsidir. Həmin gün xalqımız yenilməzliyini və müstəqillik yolunda əzmkarlığını nümayiş etdirir.
Qeyd edək ki, 20 Yanvar faciəsinin 30-cu ildönümü ilə əlaqədar səfirlik tərəfindən Azərbaycan, fars və ingilis dillərində hazırlanmış press-reliz və bu faciəni əks etdirən fotolar, Azərbaycan Xarici İşlər Nazirliyinin və Ombudsmanının bəyanatı İranın İnsan Hüquqları Şurasına və Tehranda akkreditə olunmuş diplomatik nümayəndəliklərə təqdim edilib. Həmçinin Azərbaycan Prezidentinin 20 Yanvar faciəsinin 30-cu ildönümü ilə əlaqədar sosial şəbəkədə paylaşdığı videoçarx da səfirliyin internet səhifəsində yayılıb.
Bununla yanaşı, səfirliyin “Twitter” və “Teleqram” sosial şəbəkələrində ingilis və fars dillərində 20 Yanvar faciəsi ilə bağlı məlumat, fotolar və videolar paylaşılıb. İranın bir sıra KİV-lərində 20 Yanvarla bağlı materiallar dərc etdirilib.
Rabil Kətanov
AZƏRTAC-ın xüsusi müxbiri
Tehran