SİYASƏT


İraq parlamentinin nümayəndə heyətinə ərazi bütövlüyünü bərpa edən Azərbaycanın sülh təklifləri barədə məlumat verilib

Bakı, 29 iyun, AZƏRTAC

İyunun 29-da Milli Məclis sədrinin müavini, Gənclər və idman komitəsinin sədri Adil Əliyev ölkəmizdə səfərdə olan İraq Respublikası parlamentinin sədr müavini Abdullah Ahmad Şaxvan Talabaninin başçılıq etdiyi nümayəndə heyəti ilə görüşüb.

Parlamentin Mətbuat və ictimaiyyətlə əlaqələr şöbəsindən AZƏRTAC-a bildirilib ki, qonaqları salamlayan Milli Məclis sədrinin müavini ölkələrimiz arasında diplomatik əlaqələrin qurulmasından, dostluq münasibətlərinin inkişafından danışıb. Azərbaycan tarixində xüsusi yeri olan 44 günlük Vətən müharibəsi zamanı İraqın tutduğu mövqeyi, ölkəmizə verdiyi dəstəyi yüksək qiymətləndirən Adil Əliyev həm ikitərəfli, həm də beynəlxalq təşkilatlarda uğurlu əməkdaşlığımızın hər iki tərəfin mənafeyinə uyğun olmasını bildirib.

Azərbaycanın hər zaman sülhü dəstəkləməsini qeyd edən sədr müavini, Prezident İlham Əliyevin təşəbbüsü ilə irəli sürülmüş beynəlxalq çağırışlardan söz açıb, Qoşulmama Hərəkatı Parlament Şəbəkəsinin təsis edilməsinin parlamentlər arasında əməkdaşlığı genişləndirməsindən danışıb.

Azərbaycanın beynəlxalq hüququn prinsiplərinə hörmətlə yanaşdığını, əməkdaşlığa böyük önəm verməsini diqqətə çatdıran Milli Məclis sədrinin müavini 44 günlük Vətən müharibəsində Qələbə qazanan və ərazi bütövlüyünü bərpa edən Azərbaycanın Ermənistana sülh təklifləri barədə qonaqlara məlumat verib. Lakin Ermənistan hələ bu günə qədər Azərbaycanın sülh təşəbbüslərinə adekvat cavab verməyib.

Səmimi qəbula görə minnətdarlığını bildirən İraq parlamentinin sədr müavini Abdullah Ahmad Şaxvan Talabani ölkələrimiz arasında münasibətlərin inkişafından məmnunluğunu bildirib. O, Azərbaycanın Qoşulmama Hərəkatının sədri kimi Parlament Şəbəkəsinin yaradılması təşəbbüsü ilə çıxış etməsindən təqdirlə söz açıb. Ölkələrimiz arasında həm ikitərəfli, həm də çoxtərəfli münasibətlərin inkişafının hər iki ölkənin marağına uyğun olmasını və parlamentlərarası dostluq qrupların bu inkişafa töhfə verməsini qeyd edib.

Milli Məclisin deputatları İlham Məmmədov və Müşfiq Məmmədovun iştirak etdiyi görüşdə tərəflər onları maraqlandıran məsələlər barədə fikir mübadiləsi aparıblar.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.