CƏMİYYƏT


“Yüksəliş” müsabiqəsinin yarımfinal mərhələsi başa çatıb

Bakı, 4 iyul, AZƏRTAC

“Bakı Ekspo Mərkəzi”ndə “Yüksəliş” müsabiqəsinin 3 gün davam edən yarımfinal mərhələsi başa çatıb.

AZƏRTAC xəbər verir ki, yarımfinal mərhələsinin bağlanış mərasimində çıxış edən gənclər və idman nazirinin müavini, İşçi qrupunun rəhbəri Fərhad Hacıyev iştirakçılara nümayiş etdirdikləri maraqlı mübarizə üçün təşəkkür edib. İşçi qrupunun rəhbəri kadr ehtiyatı məsələsinə də toxunub. O bildirib ki, “Yüksəliş” müsabiqəsi olaraq hədəf Azərbaycan Respublikasının Prezidenti İlham Əliyevin kadr potensialını inkişaf etdirmək siyasətini rəhbər tutaraq iştirakçıların qiymətləndirilməsi prosesində ən yeni metodologiyaları və dünya təcrübəsinə əsaslanan müasir yanaşmaları birləşdirərək ən ədalətli seçimi həyata keçirməkdir.

Qeyd edək ki, müsabiqənin yarımfinal mərhələsində 317 nəfər iştirakçı mübarizə aparıb. İştirakçıların mübarizəsi keyslər üzərindən davam edib və onların bacarıqları ekspertlər tərəfindən qiymətləndirilib. Qiymətləndirmə prosesi beynəlxalq təcrübəyə əsaslanan “Qiymətləndirmə konfransı” metodu ilə həyata keçirilib. Namizədlərin bacarıqlarının qiymətləndirilməsi onlara verilən tapşırıqlara yanaşmanın təhlili üzrə aparılıb. İştirakçılara təqdim edilən keyslər müasir dünya təcrübəsi əsasında və qabaqcıl format üzərində hazırlanıb, Azərbaycanın iqtisadiyyatı, sosial, insan resursları və yenidənqurma sahələrini ehtiva edir.

Müsabiqənin yarımfinal mərhələsinin nəticələri 3-5 iş günü ərzində açıqlanacaq. Bu mərhələni uğurla keçən 100-ə yaxın iştirakçı final mərhələsinə keçid haqqı qazanacaq. Qeyd edək ki, müsabiqənin final mərhələsinin iyulun 15-17-də baş tutması gözlənilir.

Fevralın 17-də qeydiyyatına start verilən “Yüksəliş” müsabiqəsinə 12 min 299 iştirakçı müraciət edib. Müsabiqənin 20 qalibini 1 il ərzində idarəçi rəhbərlərdən - iri şirkətlərin top-menecerlərindən və dövlət qurumlarının rəhbərlərindən fərdi karyera məsləhətləri almaq imkanı, kadr ehtiyatı bankına daxil edilmə və 20 min AZN dəyərində pul mükafatı gözləyir.

"Yüksəliş" müsabiqəsi Azərbaycan Respublikasının Prezidenti İlham Əliyevin 26 iyul 2019-cu il tarixində imzaladığı Sərəncamla intellektual səviyyəsi və idarəçilik bacarıqları yüksək olan perspektivli rəhbər şəxslərin müəyyən edilməsini, dəstəklənməsini və ölkədə kadr ehtiyatı bankının yaradılmasını təmin etmək məqsədilə təsis olunub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.