CƏMİYYƏT


Azərbaycanın beynəlxalq antikorrupsiya fəaliyyətinə töhfələri yüksək qiymətləndirilir

Azərbaycanın beynəlxalq antikorrupsiya fəaliyyətinə töhfələri yüksək qiymətləndirilir

Bakı, 8 dekabr, AZƏRTAC

Korrupsiyaya qarşı qlobal mübarizədə dünyanın 100-dən çox dövlətini birləşdirən və ölkəmizin həmtəsisçiliyi ilə yaradılmış Beynəlxalq Antikorrupsiya Orqanları Assosiasiyasının (IAACA) 9 dekabr – Beynəlxalq Antikorrupsiya Günü ərəfəsində videoformatda İcraiyyə Komitəsinin iclası və ümumi yığıncağı keçirilib.

Ədliyyə Nazirliyinin mətbuat xidmətindən AZƏRTAC-a bildiriblər ki, tədbirlərdə respublikamızın ədliyyə naziri, Assosiasiyanın vitse-prezidenti, eyni zamanda Şərqi Avropa regionu üzrə koordinatoru Fikrət Məmmədov iştirak edib.

IAACA-nın rəhbər orqanı olan İcraiyyə Komitəsinin iclasında Assosiasiyanın korrupsiya ilə qlobal mübarizədə fəaliyyəti və bu sahədə keçirdiyi tədbirlər, o cümlədən treninqlər, beynəlxalq forumlarda iştirakının genişləndirilməsi, qurumun gələcək fəaliyyəti müzakirə olunub, regional koordinatorlar tərəfindən görülən işlərə dair məlumat dinlənilib.

Ədliyyə naziri çıxış edərək Prezident İlham Əliyevin siyasi iradəsinə uyğun olaraq korrupsiyaya qarşı mübarizə tədbirlərindən, bu sahədə ölkəmizin beynəlxalq antikorrupsiya fəaliyyətində aktiv iştirakından bəhs edib.

Bildirib ki, qısa müddətdə Şərqi Avropa regionu üzrə bir çox ölkələr Azərbaycanın təşəbbüsü ilə IAACA-nın işinə cəlb olunub, ikitərəfli görüşlərdə və forumlarda bu sahədə əməkdaşlıq geniş təşviq edilib, IAACA-nın xətti ilə Bakıda 11 dövlətdən 100-dən çox nümayəndənin iştirakı ilə möhtəşəm beynəlxalq regional konfrans keçirilərək korrupsiyaya qarşı mübarizə üzrə faydalı təcrübə mübadiləsi aparılıb.

Azərbaycanın beynəlxalq antikorrupsiya fəaliyyətində səyləri yüksək qiymətləndirilərək həyata keçirdiyi tədbirlər məmnunluqla qarşılanıb.

İclasda IAACA-nın işinin səmərəliliyinin və qlobal nüfuzunun artırılması, fəaliyyəti barədə maarifləndirmənin genişləndirilməsi, o cümlədən yeni veb-saytının istifadəyə verilməsi, katibliyin Honkonqda (Çin) ayrıca ofisinin açılması, korrupsiyaya qarşı mübarizə şəbəkəsinin genişləndirilməsi və digər tədbirlər müəyyən olunub.

Ümumi yığıncaqda Assosiasiya rəhbərliyi tərəfindən görülmüş işlərə, o cümlədən Azərbaycanın IAACA-nın fəaliyyəti ilə bağlı həyata keçirdiyi tədbirlərə dair ümumi təqdimat nümayiş etdirilib. Əksəriyyəti Şərqi Avropadan olan yeni üzvlərin IAACA-ya qəbulu, regional tədbirlərin keçirilməsi və digər təşkilati məsələlər müzakirə edilib.

Yığıncaqda, həmçinin Baş Prokuror yanında Korrupsiyaya qarşı mübarizə baş idarəsinin məsul nümayəndələri iştirak ediblər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.