Gürcüstanda bir neçə orta məktəbdə maraqlı faktlar ortaya çıxıb

Tbilisi, 1 fevral, AZƏRTAC

Gürcüstan məktəblərində maraqlı vəziyyət yaranıb. Məktəblərdə müəllim və şagirdlərin sayı ilə bağlı aparılan araşdırmalar zamanı maraqlı faktlar ortaya çıxıb.

AZƏRTAC xəbər verir ki, bu barədə Gürcüstan mətbuatı məlumat yayıb.

Bildirilir ki, Gürcüstanda 2 məktəbin hər birində bir şagird təhsil alır.

Gürcüstanın Duşeti rayonunun Çarğalı kəndindəki ictimai məktəbdə 7 müəllim və 1 şagird, Kaspi rayonunun Qudaleti kəndindəki ictimai məktəbdə isə 4 müəllim və 1 şagird var.

Bundan başqa, ölkə ərazisində daha 4 kənddəki məktəblərin hər birində 2 şagird, 9 məktəbdə 3 şagird, 6 məktəbdə 4 şagird, 8 məktəbdə isə 5 şagird təhsil alır.

Ümumiyyətlə isə Gürcüstanda 288 məktəbdə 1-dən 30-dək şagird təhsil alır.

Qeyd edək ki, bu gün ümumiyyətlə Gürcüstanda 2085 məktəb fəaliyyət göstərir. Onlardan 116-sı Azərbaycan məktəbidir.

Bu məktəblərdə 632 min 726 şagird təhsil alır. Gürcüstanda orta təhsil 12 illikdir.

Xətayi Əzizov

AZƏRTAC-ın xüsusi müxbiri

Tbilisi