Yekaterinburqda Xocalı soyqırımı qurbanlarının xatirəsi anılıb
Yekaterinburq, 23 fevral, AZƏRTAC
Azərbaycanın Rusiyanın Yekaterinburq şəhərindəki Baş konsulluğunda Xocalı həftəsi çərçivəsində Xocalı soyqırımının 31-ci ildönümünə həsr olunmuş tədbiri keçirilib.
AZƏRTAC xəbər verir ki, Baş konsulluğun əməkdaşları və yerli diaspor nümayəndələri anım tədbirində iştirak edərək, soyqırımı qurbanlarının əziz xatirəsinə həsr olunmuş fotoguşəyə gül dəstələri düzüblər. Bundan sonra tədbirin rəsmi hissəsi şəhidlərimizin xatirəsinin bir dəqiqəlik sükutla yad edilməsi və Dövlət Himnimizin səsləndirilməsi ilə başlayıb.
Tədbirdə çıxış edən Baş konsul vəzifələrini yerinə yetirən Şöhrət Mustafayev, “Azərbaycan-Ural” Milli-Mədəni İctimai Təşkilatının sədri Şahin Şıxlinski, Ural Dövlət İqtisad Universitetinin dosenti Müşfiq Ağababayev, Birinci Qarabağ Müharibəsi iştirakçısı Rafiq Məmmədov Xocalı soyqırımı haqqında danışmış və Xocalı soyqırımına beynəlxalq hüquqi qiymətin veriləcəyi, habelə bu cinayəti törədənlərin Srebrenitsa soyqırımını törədənlər kimi Beynəlxalq Ədalət Məhkəməsinə çıxarılacağı günü səbirsizliklə gözlədiklərini qeyd ediblər.
Fəridə Abdullayeva
AZƏRTAC-ın xüsusi müxbiri
Yekaterinburq
Bölmənin digər xəbərləri
