Bakı, 6 iyun, AZƏRTAC

Azərbaycan 6 baldan yuxarı zəlzələ ola biləcək ölkələrdəndir.

AZƏRTAC xəbər verir ki, bunu jurnalistlərə açıqlamasında Türkiyə Elmi və Texnoloji Tədqiqat Şurasının (TÜBİTAK) rəhbəri, professor Hasan Mandal deyib.

Zəlzələ sabah olacaqmış kimi daim hazırlıqlı olmaq lazım olduğunu bildirən H.Mandal qeyd edib: "Zəlzələnin yerinin və zamanının əvvəlcədən bilinməsi çətindir. Lakin bununla bağlı bir çox araşdırmalar aparılıb. Həmin araşdırmalara görə, xüsusilə iqlim dəyişikliyi də yeraltı təkanları sürətləndirə bilər. Türkiyədə zəlzələ oldu, Azərbaycanda da olacaqmı sualına konkret cavab vermək mümkün deyil. Elmə əsaslanaraq baxdığımız zaman görürük ki, Azərbaycan da 6 baldan yuxarı zəlzələ ola biləcək ölkələrdəndir. Bu isə sabah olar, yoxsa çox uzun müddət sonra, bunu bilə bilmərik. Lakin zəlzələyə qarşı daim hazırlıqlı olmaq lazımdır".