Bakı, 10 iyun, AZƏRTAC

Böyük Britaniyanın keçmiş baş naziri Boris Conson, COVID-19 dövründə baş nazirin ofisində keçirilən partiyalarla bağlı xəbərin üzə çıxmasından sonra parlamentdəki vəzifəsindən istefa verib.

AZƏRTAC xəbər verir ki, o, qərarını koronavirusla bağlı məhdudiyyətləri pozduğuna əsaslanaraq aparılan istintaq hesabatı açıqlanmazdan əvvəl söyləyib.

Conson verdiyi yazılı açıqlamada istefaya məcbur edildiyini iddia edib və buna görə istintaq komitəsini günahlandırıb: “Məni iddialarını təsdiq edəcək heç bir dəlil olmadan və hətta Mühafizəkarlar Partiyasının üzvlərinin, hətta geniş elektoratın da razılığı olmadan bir ovuc şəxs tərəfindən vəzifəmdən kənarlaşdırılıram. Mən antidemokratik şəkildə parlamenti tərk etmək məcburiyyətində qaldığım üçün şok və dəhşətə gəlirəm”.

O, Brexit üçün ondan qisas almağa çalışdıqlarını iddia edib.