Azərbaycan ilə İrkutsk vilayəti arasında əməkdaşlıq məsələləri müzakirə olunub
Moskva, 13 iyun, AZƏRTAC
Azərbaycanın Rusiyanın Yekaterinburq şəhərindəki baş konsulu vəzifəsini icra edən Şöhrət Mustafayev İrkutsk vilayətinə səfəri çərçivəsində vilayətin qubernatoru İqor Kobzev ilə görüşüb.
AZƏRTAC xəbər verir ki, görüşdə İrkutsk vilayəti ilə Azərbaycan arasında iqtisadi və humanitar sahələrdə münasibətlərin dinamikası müzakirə olunub.
Qubernator İqor Kobzev kənd təsərrüfatı və turizm sahəsi üzrə ölkəmizlə əməkdaşlıqda maraqlı olduqlarını bildirib, Baykal gölünün vilayətin turizm sektorundakı əhəmiyyətindən bəhs edib.
Ş.Mustafayev, öz növbəsində, Azərbaycanın kənd təsərrüfatı, turizm, mədəniyyət və təhsil imkanlarından danışıb, ölkəmizin Rusiyanın federal subyektləri ilə çox sıx münasibətlərinin olduğunu qeyd edib və İrkutsk vilayəti ilə də əməkdaşlığın inkişafının əhəmiyyətini vurğulayıb.
Görüşdə qubernatora Ümummilli Lider Heydər Əliyevin 100 illik yubileyi ilə əlaqədar Baş konsulluğun dəstəyi ilə Rusiyada çap olunmuş “Heydər Əliyev - Rusiyadan baxış” kitabı hədiyyə olunub.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
