Bakı, 12 sentyabr, AZƏRTAC

“Azərbaycan Qan Donorluğunun İnkişafı Mərkəzi”nin (AQDİM) idarə heyətinin qərarı ilə “Azərbaycan Bayrağı” ali diplomuna layiq görülmüş, “Ustad Sənətkar” və “Qızıl Qələm” media mükafatçısı, “Həyat” fondunun xoşməramlı səfiri, Azərbaycan Respublikası Prezidentinin fərdi təqaüdçüsü, Azərbaycan Respublikasının Xalq artisti Könül Kazım qızı Xasıyeva AQDİM-in idarə heyətinin Fəxri üzvü seçilib.

“Azərbaycan Qan Donorluğunun İnkişafı Mərkəzi”nin mətbuat xidmətindən AZƏRTAC-a verilən məlumata əsasən, AQDİM-in əsas məqsədi müvafiq dövlət orqanları və özəl sektorlarla qan donorluğu sahəsində yaxından əməkdaşlıq etmək, eyni zamanda, Bakı və regionlarda bu istiqamətdə aparılan işin daha da gücləndirilməsinə dəstək verməkdir. Həmçinin gənclər arasında qan donorluğu və irsi qan xəstəliyi ilə bağlı təbliğatın gücləndirilməsinə xidmət etmək də mərkəzin fəaliyyəti istiqamətlərindəndir.

Qeyd edək ki, qanvermə aksiyaları və təbliğat xarakterli tədbirlər Azərbaycan Respublikasının Prezidenti İlham Əliyevin təsdiq etdiyi “Hemofiliya və talassemiyadan əziyyət çəkən uşaqlara qayğı” Dövlət Proqramına uyğun, həmçinin Heydər Əliyev Fondunun “Talassemiyasız həyat naminə” proqramı çərçivəsində təşkil olunur.