“Mastercard” ABB ilə əməkdaşlıq çərçivəsində iqlim dəyişikliyinə qarşı mübarizə üçün innovativ finteks həlləri kəşf etmək məqsədilə keçirilən “Sandbox as a Service” platforması üzrə virtual hakatonu uğurla başa vurub. Hakatonda regionun 8 aparıcı finteks startapı iştirak edib. Onlar dayanıqlı inkişafı dəstəkləmək və karbon emissiyalarını azaltmaq üçün məhsulları canlı təqdim ediblər.

Hakatonda ümumilikdə 50-dən çox regional və yerli finteks həlləri dəyərləndirilib. Finalçılar Azərbaycan bazarında fəaliyyət göstərə bilmək qabiliyyəti, banklarla inteqrasiya üçün hazır məhsullar təqdim etmək və dayanıqlılıq mövzusuna uyğun olmaq kimi meyarlara əsasən seçilib.

Final günündə İnnovasiya və Rəqəmsal İnkişaf Agentliyi, ABB, Kapital Bank, PAŞA Bank, “Mastercard” və SABAH HUB-ı təmsil edən altı ekspertə iştirakçılar tərəfindən məhsul təqdimatları keçirilib. Ekspertlər təqdim edilmiş həlləri “Sandbox as a Service” platformasında banklar, innovasiya və istifadəçi təcrübəsi üçün aktuallıq baxımından dəyərləndiriblər.

Dayanıqlılıq üzrə hakatonunun qalibləri aşağıdakılar olub:

•I yer – CARBONEMIT

• II yer – BESO

• III yer – FARADAI

Birinci yerə çıxan CARBONEMIT startapı ABB tərəfindən inkişafını genişləndirmək üçün 10000 ABŞ dolları və “Mastercard”ın “Sandbox as a Service” platformasına tam giriş imkanı əldə edib. İkinci və üçüncü yerin sahibləri isə platformaya fərdi giriş hüququ və əlavə “Mastercard” üstünlükləri ilə mükafatlandırılıblar.

Bu komandalar iqlim problemlərinin həlli üzrə qabaqcıl yanaşmalar və banklar, həmçinin maliyyə institutları üçün praktik tətbiqlər təklif etməklə münsiflərdən yüksək qiymət alıb.

“Mastercard” dayanıqlı innovasiyaları dəstəkləməyə, ətraf mühitə qarşı məsuliyyəti təşviq etməyə və daha yaşıl gələcəyə töhfə verən finteks həllərini dəstəkləmək öhdəliyinə sadiqdir.