SİYASƏT
MİLLİ MƏCLİS HÜSEYN ABDULLAYEVİN DEPUTAT TOXUNULMAZLIĞINA XİTAM VERMİŞDİR
AZƏRTAC xəbər verir ki, martın 19-da Milli Məclisin növbəti iclası keçirilmişdir. İclasda Azərbaycan Respublikası Baş prokurorunun təqdimatına əsasən, Milli Məclisin deputatı Hüseyn Abbas oğlu Abdullayevin toxunulmazlığına xitam verilməsi barədə məsələyə baxılmışdır.
Milli Məclisin sədri Oqtay Əsədov iclası açaraq bildirmişdir ki, Baş prokuror Azərbaycan Respublikası Konstitusiyasının 90-cı maddəsinin II hissəsinə əsasən, martın 17-də Milli Məclisə təqdimatla müraciət etmişdir. Təqdimatda Milli Məclisin deputatı Hüseyn Abdullayevin toxunulmazlığına xitam verilməsi xahiş olunur. Milli Məclisin Daxili Nizamnaməsinin 22-ci maddəsinə görə, Baş prokurorun təqdimatına parlamentdə 7 gün müddətində baxılmalıdır. Milli Məclisin Daxili Nizamnaməsinin müvafiq maddəsinə əsasən, təqdimat parlamentin İntizam Komissiyasına göndərilmiş, komissiya iclas keçirərək rəyini bildirmişdir.
Sonra Azərbaycan Respublikası Baş prokurorunun birinci müavini Rüstəm Usubov təqdimatı oxumuşdur. Təqdimatda deyilir ki, 2007-ci il martın 16-da saat 12.30 radələrində Milli Məclisin inzibati binasının iclas salonunda Nazirlər Kabinetinin 2006-cı ildəki fəaliyyəti ilə bağlı hesabatı dinlənilərkən Hüseyn Abdullayev mənəvi-əxlaqi keyfiyyətlərdən uzaq olan davranış göstərmiş, heç bir etika gözləməmiş, insan şərəf və ləyaqətini alçaldan təhqiramiz ifadələrə yol vermişdir. İclasa sədrlik edən tərəfindən ona bir neçə dəfə xəbərdarlıq edilmiş, bu da nəticə vermədikdə isə mikrofon söndürülmüşdür. Bundan hiddətlənən Hüseyn Abdullayev salonda olan deputatlara, eləcə də parlamentin işini izləyən mətbuat nümayəndələrinə hörmətsizlik etmiş, onu intizama dəvət edən, xuliqanlıq hərəkətlərinə son qoymağı tələb edən deputatları nalayiq ifadələrlə söyüb təhqir etmişdir. Sonra onu sakitliyə dəvət edən deputat həmkarı Fəzail Ağamalını təhqir etmiş, üstünə hücum çəkərək ona qarşı zor tətbiq etmiş, fiziki xəsarət yetirmişdir. Bu hərəkətlər nəticəsində Milli Məclisin ümumi iclasının gedişi 20 dəqiqə ərzində pozulmuşdur.
Baş prokurorun birinci müavini bildirmişdir ki, bu fakta görə martın 16-da AR Cinayət Məcəlləsinin 221.2.2-ci və 132-ci maddələri ilə cinayət işi başlanmışdır və ibtidai istintaq aparılır. İlkin araşdırmalar göstərir ki, Hüseyn Abdullayevin hərəkətlərində AR CM-in 221.2.2-ci və 132-ci maddələrinin əlamətləri vardır və o, cinayət məsuliyyətinə cəlb edilməlidir.
Lakin Azərbaycan Respublikası Konstitusiyasının 90-cı maddəsində (Milli Məclisin deputatının toxunulmazlığı) müəyyən edilmişdir ki, səlahiyyət müddəti ərzində Milli Məclisin deputatının şəxsiyyəti toxunulmazdır və bu toxunulmazlığa yalnız Baş prokurorun təqdimatına əsasən Milli Məclisin qərarı ilə xitam verilə bilər.
Milli Məclisin İntizam Komissiyasının sədri Ağacan Abıyev çıxış edərək bildirmişdir ki, Baş prokurorun təqdimatı komissiyada müzakirə edilmiş və Hüseyn Abdullayevin deputat toxunulmazlığına xitam verilməsi məsələsi Milli Məclisə tövsiyə olunmuşdur.
Məsələ ətrafında çıxış edən əksər deputatlar Hüseyn Abdullayevin Milli Məclisin 2007-ci il martın 16-da keçirilmiş iclasındakı hərəkətlərini pisləyərək, onun deputat etikasını gözləmədiyini, insan şərəf və ləyaqətini alçaldan təhqiramiz ifadələr işlətdiyini, deputat adına xələl gətirən hərəkətlər etdiyini bildirmişlər.
İclasda Hüseyn Abdullayevin deputat toxunulmazlığı məsələsi səsə qoyulmuş və 79 səslə onun toxunulmazlığına xitam verilmişdir.