Bakı, 5 fevral, AZƏRTAC 

Fevralın 15-də 47-ci Beynəlxalq Kimya Olimpiadasında çıxış edəcək Azərbaycan milli komandasına namizədlərin seçilməsi üzrə müsabiqənin zona mərhələsi keçiriləcək.

Təhsil Nazirliyindən AZƏRTAC-a bildiriblər ki, müsabiqənin bu mərhələsinin təşkili üçün respublika üzrə 10 mərkəz (Bakı, Gəncə, Mingəçevir, Şəki, Şirvan, Şamaxı, Ağdaş, Lənkəran, Xaçmaz və Naxçıvan) seçilib. Zona mərhələsində respublikanın bütün rayon və şəhərləri üzrə rayon, şəhər mərhələsində 19-dan yüksək bal toplamış 693 şagird iştirak edəcək. Bu mərhələdə suallar M.V.Lomonosov adına Moskva Dövlət Universitetinin (MDU) Bakı filialının mütəxəssisləri tərəfindən nisbətən çətinləşdirilmiş qapalı test və açıq tipli formatda hazırlanacaq. Otuz sualın cavablandırılması üçün şagirdlərə 4 saat vaxt veriləcək.

Kimya üzrə dünya olimpiadaları dərinləşdirilmiş proqram üzrə keçirildiyindən sualların cavablandırılması kimya fənni ilə yanaşı, fizikaya dair biliklərin də olmasını tələb edir. Buna görə zona mərhələsində iştirak edəcək şagirdlərin ümumi proqramla yanaşı, kimyəvi elementlərin radioaktiv parçalanması, yarımparçalanma dövrü, radioaktivlik sıraları, kimyəvi reaksiyaların istilik effekti, sürəti, tarazlıq sabiti, suyun ion hasili, hidrogen göstəricisi, pH anlayışı, elektroliz, Faradey qanunları, aromatik və heterotsiklik maddələr, aromatik turşular mövzularına diqqət yetirmələri tövsiyə olunur.

Seçim turunun respublika mərhələsi M.V.Lomonosov adına MDU-nun Bakı filialında keçiriləcək. Şagirdlər 20 çətinləşdirilmiş qapalı testi və açıq tipli sualları cavablandıracaqlar.

Səksən ölkədən 300-dən artıq məktəblinin iştirak edəcəyi 47-ci Beynəlxalq Kimya Olimpiadası iyulun 20-dən 29-dək Bakı şəhərində keçiriləcək.

Beynəlxalq Kimya Olimpiadası ilk dəfə 1968-ci ildə beş ölkənin iştirakı ilə Çexoslovakiyada (indiki Çexiyada) təşkil olunub. 2013-cü ildə 46-cı olimpiada 75 ölkədən 300 şagirdin iştirakı ilə Vyetnamın Hanoy şəhərində keçirilib. Azərbaycan məktəbliləri bu olimpiadada 2002-ci ildən iştirak edir və bu günədək onlar beş qızıl, beş gümüş, 14 bürünc olmaqla, ümumilikdə 24 medal qazanıblar.

47-ci Beynəlxalq Kimya Olimpiadası ilə bağlı ətraflı məlumat olimpiadanın rəsmi internet saytında (http://icho2015.msu.az/) yerləşdirilib.