CƏMİYYƏT
Rusiya Federasiyasının İctimai Palatasında Böyük Vətən müharibəsində Azərbaycanın roluna həsr olunmuş “dəyirmi masa” keçirilib
Moskva, 25 aprel, AZƏRTAC
Rusiya Federasiyasının (RF) İctimai Palatasında Böyük Vətən müharibəsində Azərbaycanın roluna həsr olunmuş “dəyirmi masa” keçirilib. Tədbir Rusiya Azərbaycanlı Gənclər Birliyinin (RAGB) “AmorNews” informasiya portalı, Azərbaycan Mədəniyyətinin İnkişafı və İntibahı Fondu və M.V.Lomonosov adına Moskva Dövlət Universitetinin (MDU) Azərbaycan Klubu tərəfindən təşkil edilib.
“Dəyirmi masa”nın məqsədi Rusiya gənclərini Azərbaycanın qələbəyə töhfəsi barədə geniş məlumatlandırmaq olub.
Tədbirdə MDU-nun Azərbaycan Klubunun sədri Cavid İbrahimov, “Zaşitniki Oteçestva” partiyasının nümayəndəsi Əhməd Tepsiyev, Moskva Dövlət Beynəlxalq Münasibətlər İnstitutunun Azərbaycan Klubunun sədri İlqar Qurbanov, Azərbaycan Mədəniyyətinin İnkişafı və İntibahı Fondunun direktoru Şamil Tağıyev və başqaları çıxış ediblər. Çıxışlarda müharibə zamanı təxminən 700 min azərbaycanlının göstərdiyi rəşadətdən, onlardan yarısının döyüşlərdə həlak olmasından, Azərbaycandan olan Sovet İttifaqı qəhrəmanlarından, həmvətənlərimizin partizan hərəkatında iştirakından, faşistlərin Bakını ələ keçirmək planlarından, ümumi qələbədə Bakı neftinin rolundan söhbət açılıb.
“Ofitserı Rossii” İctimai Təşkilatının rəyasət heyətinin sədri, RF İctimai Palatasının təhlükəsizlik komissiyasının sədri Anton Svetkov qeyd edib ki, toxunulan bütün mövzular təkcə Qələbənin 70 illiyi ərəfəsində deyil, hər zaman çox mühümdür. A.Svetkov deyib: “Qazanılmış qələbədə keçmiş Sovet İttifaqının bütün xalqlarının böyük rolu danılmazdır. Bayramqabağı biz bu və ya digər respublikanın qələbəyə töhfəsinə həsr edilən “dəyirmi masa”lar keçiririk. Hər xalqın deməyə sözü və qürur duymağa ixtiyarı var. Bugün bu xüsusilə mühüm və aktualdır”.
Fəridə Abdullayeva
AZƏRTAC-ın xüsusi müxbiri
Moskva