Bakı, 1 sentyabr, Göyçək Mahmudlu, AZƏRTAC

Növbədənkənar Prezident seçkilərində özüm məntəqəyə gedib səs verdim. Milli Məclisə növbədənkənar seçkilərdə də özüm gəlib səs vermək istədim. Heç birində daşınan qutu istəmədim. Bu, mənim doğma vətənimə, xüsusilə də ölkə başçısına olan sevgimdən irəli gəlir.

Bunu AZƏRTAC-a müsahibəsində 35 saylı Xətai üçüncü seçki dairəsinin 55 nömrəli tam orta məktəbdə yerləşən 9 saylı məntəqəsində səs verən 84 yaşlı seçici Ülkər Hüseynova deyib.

"Əslən Qərbi Azərbaycandanam. Allah mənə Qarabağ Zəfərini görməyi nəsib elədi. Ömür vəfa etsə, Qərbi Azərbaycanda öz dədə-baba yurdumu da görmək istəyərəm. Əminəm ki, vaxt gələcək ölkə başçısı mənim kimi yurd-yuvalarından didərgin düşən Qərbi azərbaycanlıların da öz doğma torpaqlarına qayıdışına nail olacaq. Allah Prezident İlham Əliyevə uzun ömür versin. Əsgərlərimizi, zabitlərimizi qorusun. Şəhidlərimizə də Allahdan rəhmət diləyirəm”, - deyə Ülkər Hüseynova bildirib.

Məntəqə sədri Afət Əkbərova isə siyahıda 1475 seçici olduğunu, onlardan 150-yə yaxınının artıq səsvermədə iştirak etdiyini bildirib: “Qeydiyyatdan çıxmaq və daşınan qutu üçün müraciətlər olmayıb. İlk dəfə səs verənlərin sayı 10 nəfər, 70 yaşdan yuxarı seçicilərin sayı isə 18 nəfərdir”.