Bakı, 8 noyabr, AZƏRTAC

Dörd il bundan əvvəl məhz bu gün Azərbaycan xalqının həsrətlə gözlədiyi bir bəyanat səsləndirildi. Azərbaycanın milli və dövlətçilik maraqlarını daim üstün tutan Prezident, Ali Baş Komandan İlham Əliyev 2020-ci il noyabrın 8-də Şuşa şəhərinin azad olunması münasibətilə xalqa müraciət etdi. Bildirdi ki, 28 il yarım işğal altında olan Şuşa azad edildi! Şuşa indi azaddır! Biz Şuşaya qayıtmışıq! Biz bu tarixi Qələbəni döyüş meydanında qazandıq. 2020-ci il noyabrın 8-i Azərbaycan tarixində əbədi qalacaqdır. Bu tarix əbədi yaşayacaq. Bu, bizim şanlı Qələbəmizin, Zəfərimizin günüdür! Azərbaycan Prezidentinin 2020-ci il dekabrın 3-də imzaladığı Sərəncama əsasən, noyabrın 8-i bayram günləri sırasına daxil edildi və hər il Azərbaycanda Zəfər Günü kimi böyük coşqu ilə qeyd edilir. Məhz bu gün Azərbaycan siyasi-milli iradəsini, xalq-ordu birliyini və dünya ölkələrinə örnək ola biləcək müharibə siyasətini əks etdirdi. Azərbaycan əsgərlərinin şücaəti və fədakarlığı xalqın qürur mənbəyinə çevrildi.

AZƏRTAC xəbər verir ki, bu sözləri beynəlxalq dərəcəli təlimçi, şəxsi inkişaf üzrə kouç İlahə Adil söyləyib.

O qeyd edib ki, 2020-ci ilin sentyabrında başlayan və 44 gün davam edən İkinci Qarabağ müharibəsi, Azərbaycanın tarixi Qələbəsi ilə nəticələndi. Həmin il noyabrın 8-də Azərbaycan Ordusu Şuşa şəhərini işğaldan azad edərək müharibənin taleyini həll etdi. Bu tarixi Qələbə Azərbaycan xalqının və Ordusunun birliyini, əzmini göstərdi. Xalqın Orduya göstərdiyi dəstək hər bir vətəndaşın bu müharibədə özünü iştirakçı kimi hiss etməsinə səbəb oldu. Azərbaycan xalqının vətənpərvərlik ruhu müharibə dövründə daha da gücləndi. Xalqın milli kimliyə olan bağlılığı və torpaqların azad edilməsi uğrunda göstərdiyi qətiyyət ordunun mübarizəsinə böyük dəstək olaraq, Azərbaycan xalqının və Silahlı Qüvvələrinin vahid məqsəd uğrunda necə birləşə bildiyini nümayiş etdirdi. İkinci Qarabağ müharibəsində Azərbaycan Silahlı Qüvvələrinin tətbiq etdiyi hərbi strategiyası, müasir döyüş texnikası və taktikası, qısa müddətdə Qələbə qazanması yeni döyüş əməliyyatları kimi bir çox ölkənin hərbi araşdırma mərkəzlərində təhlil olundu və döyüş praktikalarında tətbiqinə başlanıldı. Azərbaycanın iqtisadi sabitliyi və resursların düzgün yönləndirilməsi müharibə aparmaq üçün vacib olan dəstəyi təmin etmişdi. 44 günlük Vətən müharibəsi dövründə Prezident İlham Əliyevin beynəlxalq arenada aktiv diplomatik fəaliyyəti müharibənin gedişində və nəticəsində böyük rol oynadı. İndi dünyada müxtəlif yerlərdə gedən iqtisadi proseslər, çətinliklər, böhranlar onu göstərir ki, Azərbaycan iqtisadiyyatı dayanıqlı iqtisadiyyatdır. Belə ağır müharibədən çıxmış ölkə azad edilmiş torpaqlarda genişmiqyaslı quruculuq işləri həyata keçirir.

Azərbaycan Prezidentinin qeyd etdiyi kimi, biz döyüş meydanında da, informasiya məkanında da, siyasi müstəvidə də Qələbə qazandıq. Prezident İlham Əliyev birmənalı olaraq bildirib ki, Azərbaycanın işi haqq işidir və Qarabağ Azərbaycandır!

“8 Noyabr - Zəfər Günü Azərbaycanın siyasi rəhbərliyi, xalq və ordu birliyinin, qətiyyətinin və vətənpərvərlik ruhunun rəmzidir. Azərbaycan bu Qələbəsi ilə tarixi ədaləti bərpa etdi və işğal altındakı torpaqlarını qurtararaq xalqının haqqını və qürurunu geri qaytardı. Bu tarixi Zəfər gələcək nəsillərə qürur və ilham mənbəyi kimi miras qalacaq, onların hər zaman Vətənə olan sevgisini və bağlılığını artıracaqdır. Sənə qalibiyyət yaraşır, doğma Vətənim! Zəfərin mübarək, Azərbaycan!”, - deyə İlahə Adil bildirib.