Bakı, 26 aprel, AZƏRTAC

Amerika Birləşmiş Ştatlarının Prezidenti Co Baydenin bu il aprelin 24-də 1915–ci il hadisələri ilə bağlı səsləndirdiyi bəyanatda “erməni soyqırımı” ifadəsini işlətməsi təəssüf doğurur. Dünyanın supergüc dövlətinin başçısının tarixi faktları təhrif etməsi, əsassız danışığı, qondarma “erməni soyqırımı” ifadəsini gündəmə gətirməsi dünyada baş alıb gedən ikili standartların, islamofobiyanın bariz nümunəsidir. Əslində, ABŞ Prezidenti bu ifadədən Türkiyəyə qarşı təzyiq və təhdid vasitəsi kimi istifadə edir. Digər tərəfdən ermənipərəst mövqeyini gizlətməyərək Azərbaycana da bir mesaj ünvanlayır. Axı, Azərbaycan Silahlı Qüvvələri ötən il sentyabrın 27-də işğalçı Ermənistanın başladığı müharibəni 44 gün ərzində tarixi Qələbə ilə yekunlaşdırdı və Ermənistan dövlətini diz çökdürdü, kapitulyasiya aktını imzalamağa məcbur etdi.

AZƏRTAC xəbər verir ki, bu fikirlər YAP Səbail rayon təşkilatı sədrinin müavini, politoloq Mehman İsmayılov bildirib.

Politoloq qeyd edib ki, həmin müharibədə tarixi Qələbənin qazanılmasında Türkiyə-Azərbaycan dostluq və qardaşlığı mühüm rol oynadı. Dünya birliyi bir daha şahidi oldu ki, iki ölkənin birliyini heç bir qüvvə sarsıda bilməz. Görünür, Ermənistanın acınacaqlı məğlubiyyətini digər ermənipərəstlər kimi ABŞ Prezidenti də həzm edə bilmir. Ona görə də “erməni soyqırımı” ifadəsini işlətmək yolu ilə təzyiqə və təhdidə cəhd edir.

“Tarixi sənədlər sübut edir ki, 1915-ci ildə Türkiyə ərazisində ermənilərə qarşı heç bir soyqırımı faktı olmayıb. Aparılan tədqiqatlar və arxiv sənədləri də təsdiqləyir ki, həmin dövrdə ermənilər çoxsaylı silahlı dəstələr yaradaraq arxa cəbhədə üsyan qaldırmış və türk ordusuna hücumlar təşkil etmişlər. Erməni quldurları müxtəlif yaşayış məntəqələrini dağıdaraq kütləvi qətllər törətmiş, əhaliyə qarşı xüsusi amansızlıq etmişlər. Ermənilər müxtəlif vasitələrlə Türkiyəni müharibəyə cəlb etmişlər. Təbii ki, türk ordusu da dinc əhalini müdafiə etmək, onları erməni barbarlığından müdafiə etmək üçün bütün vasitələrdən istifadə edib. Həmin vaxt həyata keçirilən tədbirlərdən biri də ermənilərin digər ərazilərə köçürülməsi olub və bu zaman heç bir soyqırımı baş verməyib”, - deyə Mehman İsmayılov qeyd edib.

YAP Səbail rayon təşkilatı sədrinin müavini bildirib ki, ermənilər bu köçürülmədən istifadə edərək onlara qarşı soyqırımı törədildiyini iddia edir, himayədarları vasitəsilə Türkiyəyə və Azərbaycana qarşı “erməni soyqırımı” alətindən təzyiq aləti kimi istifadə edirlər. Təəssüf ki, dünya birliyi də bu ədalətsizliyə göz yumur, uzun illərdir günahsız insanlara qarşı ağlasığmaz işgəncələr verən, yaşayış məntəqələrini yerlə-yeksan edən, tarixi mədəni abidələri dağıdan, faşizm ideologiyasını təbliğ edən Ermənistanın bütün qeyri-insani humanistliyinə göz yumur, bir çox hallarda isə bu vəhşiliyə, qəddarlığa təkan verirlər. Belə himayədarların vasitəsilə son illər uydurma “erməni soyqırımı” iddiaları dünya gündəmində daha geniş vüsət alıb.

Politoloq deyib: “ABŞ Prezidenti Co Baydenin bu günlərdə “erməni soyqırımı” ifadəsini işlətməsi də ikili standartların, islamofobiyanın bariz nümunəsidir. Görünür, Co Bayden siyasətlə tarixi təhqiqatların yerini dəyişib. Bu günə qədər bütün arxivlər qapılarını açıq elan etsələr də, bəzi siyasi riyakarlar heç bir araşdırma aparmadan “erməni soyqırımı” ifadəsini işlətməklə gündən–günə güclənən Türkiyəyə və Azərbaycana təzyiq etmək istəyirlər. Təəssüf ki, ABŞ Prezidenti də erməni lobbisinin təsiri altındadır. Belə olmasaydı, o, ABŞ prezidentlərinin heç birinin bu günə qədər işlətmədikləri bu ifadəni dilinə gətirməzdi. Dövlətimizin başçısı İlham Əliyev aprelin 24-də Türkiyə Respublikasının Prezidenti Rəcəb Tayyib Ərdoğan ilə telefon danışığı zamanı Co Baydenin “erməni soyqırımı” ifadəsini işlətməsini tarixi səhv adlandırdı və bu bəyanatı qəbuledilməz hesab etdiyini vurğuladı.

Co Baydenin “erməni soyqırımı” ifadəsini işlətməsi dərhal beynəlxalq aləmdə etirazla qarşılandı. Fikrimi əsaslandırmaq üçün Rus Pravoslav Kilsəsinin rəhbəri, Moskva və bütün Rusiyanın patriarxı Kirillin “Rosiya 24” telekanalına verdiyi müsahibəsi ilə əsaslandırmaq istərdim. Kilsənin rəhbəri deyib: “Osmanlı imperiyasında heç kim xristian azlıqları məhv etməyib. İslam dünyasında buna bənzər hadisələr olmayıb”.

Türkiyəni “erməni soyqırımı”nda ittiham edən Co Bayden, necə deyərlər, “öz gözlərində tiri qoyub, başqasının gözlərində tük axtarır”. Sonda ABŞ-ın müxtəlif ölkələrdə törətdiyi soyqırımıları diqqətə çatdırmaq istərdim. Vyetnamda 4, Koreyada 3, Kamboca və Laosda, eləcə də İraq və Əfqanıstanda hər birində 1 milyon insan qətlə yetirilib. Xirosima və Naqasakinin atom bombardmanı zamanı 350 min, qaradərililərin ayrıca qətliamı isə 15 milyon nəfərdir”.