CƏMİYYƏT
ABŞ-da “Şuşa İli”nə həsr edilmiş silsilə tədbirlərin təşkili” adlı layihənin icrasına başlanılıb
Bakı, 15 avqust, AZƏRTAC
Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin “Şuşa İli”nə həsr olunmuş xüsusi müsabiqəsinin qalibi olmuş "Ekonomiks" Beynəlxalq İqtisadi Araşdırmalar İctimai Birliyi “ABŞ-da Şuşa ilinə həsr edilmiş silsilə tədbirlərin təşkili” layihəsinin hazırlıq mərhələsində nəzərdə tutduğu tədbirlərin icrasına başlayıb.
"Ekonomiks" Beynəlxalq İqtisadi Araşdırmalar İctimai Birliyindən AZƏRTAC-a verilən məlumata görə, İctimai Birlik Azərbaycan Respublikasında 2022-ci ilin “Şuşa İli” elan edilməsi haqqında Azərbaycan Respublikası Prezidentinin 2022-ci il 5 yanvar tarixli Sərəncamı və bu sənəddən irəli gələn tədbirlərin təşkilinə dair Nazirlər Kabinetinin 2022-ci il 25 fevral tarixli Sərəncamı ilə təsdiq edilmiş Tədbirlər Planında nəzərdə tutulmuş fəaliyyətləri əsas götürərək, layihənin ABŞ-da icrası ideyasını irəli sürüb.
Sərəncama əsasən təsdiq edilmiş Tədbirlər Planında “Şuşa İli”nin beynəlxalq səviyyədə təbliği ilə əlaqədar Azərbaycanda və xarici ölkələrdə, beynəlxalq təşkilatların mənzil-qərargahlarında “Şuşa İli”nə həsr olunmuş tədbirlərin, elmi konfrans, simpoziumların keçirilməsi və təbliğat xarakterli digər işlərin görülməsi prioritet kimi müəyyən edilib.
İctimai Birlik layihəni qərb ölkələrində, xüsusilə erməni lobbisinin üstünlük təşkil etdiyi ABŞ-da gerçəkləşdirməyi hədəfləyib.
Təşkilat layihənin uğurlu icrasının əsasını təşkil edən heyəti artıq formalaşdırıb, layihənin geniş planlaşdırma işlərini, o cümlədən idarəetmə planı, maliyyə planı, kommunikasiya planı, satınalma planı, əməliyyat planı, risklərin idarə edilməsi planı hazırlayıb və həmin planlar üzrə icra prosesinə start verib.
Hazırda layihə heyəti ABŞ-a səfər planlaşdırır. Bu məqsədlə ABŞ-da yaşayan Azərbaycan icmasının nümayəndələri, bu ölkədəki akademik dairələrlə müzakirələr, hədəf qrupların tədbirə cəlbi istiqamətində təbliğat-təşviqat işləri aparır.
Layihənin əsas məqsədi xarici ölkələrdə, o cümlədən ABŞ-ın Kaliforniya Ştatında “Şuşa İli”nə həsr olunmuş silsilə tədbirlərin keçirilməsi və təbliğat xarakterli işlərin görülməsidir.
Layihə müddətində ABŞ-ın Kaliforniya ştatında, San-Fransisko və Sakramento şəhərlərində müxtəlif mədəni tədbirlərin keçirilməsi nəzərdə tutulub.