ABŞ-da təyyarə yerə endikdən sonra iki hissəyə ayrılıb

Bakı, 28 sentyabr, AZƏRTAC

ABŞ-ın Cənubi Karolina ştatında yerləşən Qrinvill şəhərində təyyarənin qəzaya uğraması nəticəsində azı 2 nəfər həlak olub, 2 nəfər isə xəsarət alıb.

AZƏRTAC TASS informasiya agentliyinə istinadla xəbər verir ki, “Dassault-Breguet Falcon 50” təyyarəsi hava limanına endikdən sonra qalxma-enmə zolağından çıxıb və iki hissəyə bölünüb.

Aeroport administrasiyasının məlumatına əsasən, qəza zamanı təyyarənin göyərtəsində 2 sərnişin və 2 pilot olub. Pilotlardan biri qəza yerində, digəri isə xəstəxanada ölüb. Sərnişinlərin vəziyyətinin ağır olduğu bildirilir.

Hadisə ilə əlaqədar təhqiqat başlayıb.