DÜNYA


ABŞ-ın qərb sahillərində COVID-19-la bağlı yeni məhdudiyyətlər tətbiq edilir

Vaşinqton, 18 noyabr, AZƏRTAC

Yenilənmiş məlumatlara əsasən, noyabrın 17-də ABŞ-da 160 mindən çox yeni koronavirusa yoluxma halları qeydə alınıb.

AZƏRTAC xəbər verir ki, ABŞ-ın qərb sahillərindəki bəzi ştatlarda COVID-19-a yoluxma hallarının kəskin artması ilə əlaqədar yeni məhdudiyyətlər tətbiq edilir.

Cons Hopkins Universitetinin məlumatında göstərilir ki, noyabrın 16-da 166 mindən çox yeni yoluxma halları qeydə alınıb. Bu, COVID-19 pandemiyası tarixində gün ərzində yoluxmaların sayına görə üçüncü göstəricidir. Üç rekord göstəricinin hər biri ötən həftə qeydə alınıb, o cümlədən noyabrın 13-də ən yüksək antirekord – 177 min yoluxma baş verib. Cons Hopkins Universiteti onu da bildirib ki, noyabrın 16-da COVID-19 ilə bağlı 1000 ölüm faktı qeydə alınıb. Pandemiyanın əvvəlindən bəri ölkədə 11,2 milyon yoluxma və 247 300 ölüm faktı qeydə alınıb.

Noyabrın 17-də Kaliforniyada yeni məhdudiyyətlər qüvvəyə minib. Bu məhdudiyyətlər ştat əhalisinin 94 faizinin yaşadığı dairələrdə tətbiq edilir. Ştat hökumətinin qərarına əsasən, həmin dairələrdə ən ciddi rejim yenidən qüvvəyə minir, iqtisadi fəallığı ikinci dərəcəli hesab edilən müəssisələrin çoxu bağlanılır.

Qubernator Gevin Nyusom ictimai yerlərdə bəzi istisnalar nəzərə alınmaqla maskalardan istifadə edilməsi qaydalarını sərtləşdirib, komendant saatı tətbiq edilməsinin mümkünlüyü araşdırılır.

AZƏRTAC-ın Vaşinqton bürosu

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.