DÜNYA
ABŞ öz hərbçilərini Suriyadan İraqa çəkib
Bakı, 21 oktyabr, AZƏRTAC
Amerikalı hərbçilər qrupu Suriya sərhədini keçərək İraqın şimalında yerləşən Dahuk əyalətinə yollanıb.
AZƏRTAC Reuters agentliyinə istinadla xəbər verir ki, İraqa, həmçinin 100-ə yaxın zirehli texnika da göndərilib.
Xatırladaq ki, oktyabrın 9-da Türkiyə Prezidenti Rəcəb Tayyib Ərdoğan Suriyanın şimalında terrorçulardan təmizlənmiş bufer zonasının yaradılması məqsədilə “Sülh çeşməsi” əməliyyatının başladığını elan edib. Həmçinin Ankara bu sərhədyanı ərazilərdə suriyalı qaçqınları yerləşdirmək fikrindədir.
Oktyabrın 13-də Pentaqon rəhbəri Mark Esper Türkiyənin keçirdiyi hərbi əməliyyatlar səbəbindən Suriyanın şimalından minə yaxın hərbçinin çıxarılması prosesinə başlandığını bildirib. Oktyabrın 16-da ABŞ-ın başçılıq etdiyi beynəlxalq koalisiya Ayn-əl-Ərəb (Kobani) şəhəri rayonunda yerləşən hərbi bazasını tamamilə ləğv edib. Elə həmin gün koalisiya qüvvələri Suriyanın şimal-şərqində yerləşən Rakka və Tabku şəhərlərindən də çıxıb.
Suriyanın şimal-şərqində hərbi əməliyyatların müvəqqəti olaraq dayandırılması ilə bağlı oktyabrın 17-də ABŞ və Türkiyə arasında razılaşma əldə olunub. Sazişin şərtinə əsasən, terrorçular 120 saat ərzində Suriya-Türkiyə sərhədindən geri çəkməlidir.