Gəncə, 9 iyun, Elcan Məmmədov, AZƏRTAC

Almaniya Federativ Respublikasının Akkreditasiya, Sertifikasiya və Keyfiyyətin Təminatı İnstitutunun 9 may 2023 tarixli qərarı ilə Azərbaycan Dövlət Aqrar Universitetinin (ADAU) ali təhsilin magistratura səviyyəsinin menecment (alman proqramı) ixtisaslaşması növbəti dəfə beynəlxalq akkreditasiyadan keçib.

AZƏRTAC-ın bölgə müxbiri xəbər verir ki, Almaniya Federativ Respublikasının Veihenstephan-Triesdorf Tətbiqi Elmlər Universitetinin “agricultural menecment” ixtisasının təhsil proqramı əsasında 2010/2011-ci tədris ilindən kadr hazırlığın aparılan bu ixtisaslaşmada hazırda magistratura səviyyəsində ADAU-nun 7 tələbəsi təhsil alır.

Qeyd edək ki, Almaniya Federativ Respublikasının Akkreditasiya, Sertifikasiya və Keyfiyyətin Təminatı İnstitutu 2009-cu ildən Keyfiyyətin Təminatı üzrə Avropa Reyestrinin (EQAR) üzvüdür.