SİYASƏT


ADA Universitetində keçirilən konfransda Azərbaycan Prezidenti liderlik və intellektual potensialını bir daha ortaya qoydu

Bakı, 14 aprel, AZƏRTAC

Azərbaycan Prezidenti İlham Əliyev ADA Universitetində keçirilən “Cənubi Qafqaza yeni baxış: münaqişədən sonra inkişaf və əməkdaşlıq” adlı beynəlxalq konfransda üç saatdan çox çıxış etdi. Azərbaycan Prezidenti konfrans çərçivəsində bir çox məsələlərə aydınlıq gətirdi, yenə də səbir və təmkinlə sualları cavablandırdı. Konfrans Azərbaycan və region üçün hazırkı reallıq, bundan sonrakı mərhələ haqqında məlumat vermək üçün geniş auditoriya və səmərəli fürsət idi. Müharibənin səngərdə bitib, lakin informasiya məkanında hələ də davam etdiyini nəzərə alsaq, dövlətimizin başçısı aparılan dezinformasiya kampaniyasına tutarlı və faktlarla cavablar verdi. Beləliklə, dünyanın siyasi mənzərəsi haqqında fikir formalaşdıran müxtəlif ölkələrin beyin mərkəzlərinin, xeyli sayda açıq düşüncəli insanlarının və beynəlxalq aləmin qarşısında Azərbaycan Prezidenti hər zaman olduğu kimi, liderlik və intellektual potensialını bir daha ortaya qoydu. Artıq müharibədən sonra vəziyyət dəyişib. Atəşkəs əldə olunmasına baxmayaraq, münaqişə ilə bağlı çoxlu suallar qalmaqdadır. Aparıcı ekspertlərin bir araya gəlib yaranmış yeni reallıq və bundan sonrakı inkişaf və əməkdaşlıq haqqında, Azərbaycanın bu məsələ barədə dəqiq və konkret mesajlarının, istəklərinin və real addımlarının, gözləntilərinin nələrdən ibarət olduğu haqqında məhz birinci şəxsin dilindən cavablar eşitməsi olduqca mühüm əhəmiyyət kəsb edir.

Bunu AZƏRTAC-a açıqlamasında politoloq Şəbnəm Həsənova bildirib.

Politoloq deyib: “Konfransda verilən cavablar bir daha göstərdi ki, Azərbaycan sülhün bərqərar olmasında nə dərəcədə qətiyyətlidir. Bununla yanaşı, konfransdan əvvəl iştirakçıların Ağdama aparılaraq onlara məhv edilmiş ərazilərin əyani şəkildə göstərilməsi qarşı tərəfin müharibə zamanı və ondan sonrakı dövrdə məqsəd və məramının nə olduğunu dəqiq anlamaları baxımından mühüm əhəmiyyət kəsb edir. Bütün dünya artıq Ermənistana başa salmalıdır ki, Azərbaycanın ərazi bütövlüyünü və sərhədlərini qəbul etsin. Ermənistan bu reallığı dərk edərsə, udacaq, əksini iddia edərsə, itirməyə davam edəcək”.

Bildirilib ki, konfrans sosial şəbəkələrdə yerli ictimaiyyət tərəfindən, beynəlxalq media tərəfindən də izlənildi. Bu gün dünyanın gözü Azərbaycandadır. Həm döyüş meydanında, həm də informasiya məkanında öz sözünü deyən Azərbaycan bundan öncə yerli və xarici media nümayəndələri üçün keçirilən mətbuat konfransında da bütün dünyanı yaxşı mənada təəccübləndirmişdi. Eyni vəziyyəti bu konfransda da gördük. Əgər müharibədən sonra Azərbaycanın mövqeyi haqqında beyinlərdə xırda da olsa, sual qalmışdısa, indi bütün o qaranlıq məqamlara da aydınlıq gətirildi. Dövlətimizin başçısının istənilən mövzuda sualı təmkin, diplomatik məharət, faktlarla şərh etməsi artıq dünyada Azərbaycan haqqında olduqca müsbət imic formalaşdırıb. Aparıcı beyin mərkəzlərinin təmsilçilərinin Azərbaycana olan marağı, sualları göstərir ki, indi beynəlxalq aləm bizim yaratdığımız reallığı yaxından izləyir. Azərbaycan liderinin istər bir siyasətçi kimi siyasi iradəsi, istərsə də bir insan kimi bütün müsbət şəxsi keyfiyyətləri elə Azərbaycan xalqının özünün imici haqqında dünyada olduqca müsbət imic formalaşdırır.

Azərbaycan özü öz taleyinin qurucusu, yaradıcısıdır. Müstəqil siyasət yürüdən, Azərbaycan xalqının milli maraqlarını əlində məşəl tutaraq hər keçən gün onun haqq səsini dünyada daha da ucaldan şəxs isə ümummilli lider Heydər Əliyevin siyasi xəttini daha da inkişaf etdirən Prezident İlham Əliyevdir.

Qeyd olunduğu kimi, tədbirə maraq ölkə daxilində və xaricdən idi. Xalqımız əmindir ki, Azərbaycanı dünyanın etibarlı tərəfdaşı mərtəbəsinə qaldıran, onu müstəqil xarici siyasət yeridən bir dövlət kimi tanıdan Prezident İlham Əliyev Azərbaycanın mövqeyini bir daha milli maraqları əsas tutmaqla diqqətə çatdırdı. Azərbaycana olan müsbət münasibət bir daha göründü. Bu baxımdan da xalq da sosial şəbəkələrdə yenə həmrəylik nümayiş etdirdi. Dünya Azərbaycanın nə qədər həmrəy, öz liderinin ətrafında hər keçən gün daha da möhkəm birləşdiyinin şahidi oldu. Bu birlik isə sarsılmazdır. Azərbaycan xalqı əmindir ki, Prezident İlham Əliyev xalqımızın alternativsiz Lideri, onun milli maraqlarının hamisidir.

Azərbaycan yeni reallığı yaradıb, bunu Ermənistan da qəbul etməlidir. Azərbaycan sülhə hazırdır. Əslində, Azərbaycan Prezidenti “Ermənistan öz statusuna aydınlıq gətirməlidir” deyərkən ötürdüyü mesajlar bir tərəfdən Ermənistanda olan indiki revanşist dairələrə idisə, digər tərəfdən, həm də onları himayə edənlərə idi. Bəli, dövlətimizin başçısı yenə də əsas tutduğu hücum diplomatiyası ilə Ermənistana və lazımi dairələrə lazımi mesajları ötürdü. Artıq Azərbaycan əvvəlki Azərbaycan deyil. Azərbaycan öz ərazi bütövlüyünü özü təmin edən, regionda yeni reallıq yaradaraq hər kəsi bununla razılaşmağa, barışmağa və hesablaşmağa məcbur edən ölkədir. Prezident İlham Əliyev “İsgəndər-M” raketləri ilə bağlı da yenə qətiyyət nümayiş etdirdi. Bu isə bir daha göstərir ki, Azərbaycan Prezident İlham Əliyevin rəhbərliyi ilə heç bir halda prinsiplərindən dönmür. Tarixə diqqət çəkən Azərbaycan Prezidenti bir daha xatırlatdı ki, Ermənistan kimlərin əli ilə, kimin tarixi torpaqlarında, hansı məqsədlə yaradıldığını unutmasın. Bunların hamısı tarixi həqiqətlərdir. Bunun üçün isə XX əsrin əvvəllərindəki xəritəyə baxmaq kifayətdir.

Politoloq diqqətə çatdırıb ki, işğaldan azad edilmiş torpaqlarda yenidənqurma işləri haqqında da məlumat verən dövlətimizin başçısı Azərbaycanın Qarabağda əsas infrastruktur layihələrinin üç il müddətində başa çatdırılmasını hədəflədiyini, işğaldan azad edilmiş ərazilərin əsasən ölkə iqtisadiyyatımızda, qeyri-enerji sektorunda, o cümlədən nəqliyyat sektorunda vacib yerlərdən birini tutacağını qeyd etdi. Türkiyə, İtaliya, Böyük Britaniya kimi ölkələrin bu işlərdə yer alması bir daha göstərdi ki, Prezident İlham Əliyevin rəhbərliyi ilə Azərbaycan regionda əməkdaşlıq yaradaraq, daha bir beynəlxalq uğura imza atdı.

Qazandığımız Qələbənin böyüklüyünü dünyanın nüfuzlu insanları da olduqca konkret şəkildə ifadə edirlər. Belə ki, İsveçin Təhlükəsizlik və İnkişaf Siyasəti İnstitutunun direktoru Svante Kornelin fikirləri bu baxımdan olduqca düzgün və aydındır: “Azərbaycanın böyük güclər arasında real və ya təsəvvürdə olan geosiyasi oyunların obyekti olmadığı, tam əksinə, öz hüququ olan bir güc olduğu sübuta yetirilib”.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.