Demokratik inkişaf yolunu tutmuş Azərbaycan Respublikasında çoxpartiyalı sistem, fikir plüralizmi bərqərar olunmuş, 42 siyasi partiya, 1400-dən çox ictimai birlik dövlət qeydiyyatına alınmış, 800-dən artıq kütləvi informasiya vasitələrinin sərbəst fəaliyyəti üçün hərtərəfli şərait yaradılmışdır. 

Bununla belə, bəzi siyasi partiyalarda mövcud olan təşkilatdaxili münaqişələr, qarşılıqlı dözümsüzlük nümayiş etdirilməsi və qeyri-demokratik metodlarla idarəetmə cəhdləri Azərbaycan siyasi sisteminin inkişafına mənfi təsir göstərir.

Belə ki, 1995-ci ildə siyasi partiya kimi dövlət qeydiyyatından keçmiş Azərbaycan Xalq Cəbhəsi Partiyasının müxtəlif qruplaşmaları arasında mövcud olan fikir ayrılıqları və daxili çəkişmələr partiya sədri Ə.Əliyevin vəfatından sonra açıq münaqişəyə çevrilmiş, ümumqəbuledilmiş demokratik prinsiplərə, o cümlədən “Siyasi partiyalar haqqında” Qanunla müəyyən edilmiş aşkarlıq, qanunçuluq, üzvlərin hüquq bərabərliyi və digər prinsiplərə əməl edilməməsi adi hal almışdır.

Nəticədə AXCP sədrinin müavinləri Mirmahmud Fəttayev və Əli Kərimlinin başçılıq etdiyi qruplaşmalar bir-birlərini qarşılıqlı inkar edərək, keçirdikləri toplantılarda hər biri yalnız özünü Azərbaycan Xalq Cəbhəsi Partiyası adı ilə mövcud olan yeganə təşkilat elan etmiş, müvafiq olaraq M.Fəttayevin və Ə.Kərimlinin partiya sədri seçilməsi əks qruplaşmanın rəhbərlərinin partiya sıralarından xaric edilməsi barədə və münaqişəni daha da kəskinləşdirən digər qərarlar qəbul etmişlər.

Həmçinin hər iki tərəf Ədliyyə Nazirliyinə müraciətlər edərək, öz mövqelərini əsaslandırmağa çalışmaqla, AXCP-ni məhz onun təmsil etdiyini bildirmiş, dövlət qeydiyyatı ilə bağlı müvafiq sənədlərini təqdim etmişlər.

Təşkilatın rəhbər orqanlarının öz funksiyalarını lazımınca yerinə yetirməməsi, demokratik idarəçilik qaydalarına məhəl qoymayan ayrı-ayrı partiya rəhbərlərinin təşkilatdaxili hakimiyyəti əldə saxlamaq məqsədi ilə inzibati-amirlik üsullarından istifadə etməsi də belə vəziyyətin yaranmasının əsas səbəblərindən olmuşdur.

Partiya fəalları tərəfindən parçalanmanın qarşısının alınması və birləşməyə yönələn çoxsaylı səylər göstərilmiş, qruplaşmaların rəhbərləri qərar qəbul edərək, birləşmə barədə danışıqlar aparmaq üçün hər iki tərəfin nümayəndələrindən ibarət komissiya təşkil etmiş və komissiya birləşdirici qurultaya hazırlıq üzrə Təşkilat Komitəsi yaratmışdır. Bu qərarı rayon şöbələri də dəstəkləmişlər.

Lakin partiyaya sədrlik məsələsində mövcud olan fikir ayrılıqlarına görə, tərəflərə rəhbərlik edən şəxslər danışıqlardan imtina etmişlər.

Buna baxmayaraq, hər iki tərəfdən olan və partiya quruculuğunda fəal iştirak etmiş şəxslərdən formalaşmış Təşkilat Komitəsi partiyanı böhrandan xilas etmək məqsədi ilə öz işini davam etdirmiş, Komitə tərəfindən münaqişə edən tərəflərin rəhbərlərinə müraciət edilərək, onlar birləşmə prosesinə yenidən qoşulmağa dəvət olunmuş, partiya orqanlarına yeni, demokratik əsaslarla seçkilərin keçirilməsi təklif edilmişdir.

Təşkilat Komitəsinin birləşməyə olan səyləri, ayrı-ayrı rəhbər şəxslər istisna olmaqla, rayon təşkilatları tərəfindən dəstəklənmiş, 54 rayonda hər iki tərəfin birgə konfransları keçirilərək, birləşdirici qurultaya nümayəndələr seçilmişdir.

Ötən il partiyanın nizamnaməsinə uyğun keçirilmiş həmin qurultayda 68 rayon təşkilatı təmsil olunmuş, AXCP-nin vahid siyasi partiya olduğu bəyan edilmiş, təşkilatın yeni rəhbər orqanları və sədri (Q.Həsənquliyev) seçilmiş, yeni redaksiyada nizamnamə qəbul olunaraq, dövlət qeydiyyatına alınması üçün Ədliyyə Nazirliyinə təqdim edilmişdir.

Ədliyyə Nazirliyinin Kollegiyasında Azərbaycan Xalq Cəbhəsi Partiyası adından çıxış edən bütün tərəflərin fəaliyyətinin qanunauyğunluğu və dövlət qeydiyyatı ilə bağlı təqdim olunmuş sənədlər araşdırılmış və AXCP-nin əksər rayon təşkilatlarının iştirakı ilə keçirilmiş birləşdirici qurultayda qəbul olunmuş qərarların qanuni olduğu müəyyən edilərək, AXCP-nin yeni redaksiyada nizamnaməsinin və digər faktların dövlət qeydiyyatına alınması barədə qərar qəbul olunmuşdur.

X X X

Azərbaycan Respublikasında 70-ə qədər xarici humanitar təşkilat dövlət qeydiyyatına alınmışdır. Bu təşkilatlardan təyinatlarına uyğun fəaliyyət göstərənlərlə yanaşı, bəziləri əhalinin aztəminatlı hissəsinin sosial problemlərinin həlli pərdəsi arxasında ziyanlı fəaliyyətlə məşğul olmuş, terrorçu qurumlarla əməkdaşlıq etməklə, dini ədavət və fanatizm oyadan ideyalar təbliğ etmişlər.

Bununla əlaqədar, müvafiq tədbirlər görülmüş və bir sıra belə təşkilatlar, o cümlədən mərkəzi ofisi Küveytdə yerləşən “Xəstələrə Yardım Fondu”nun Azərbaycan şöbəsi, “Qətər” təşkilatı nümayəndəliyinin dövlət qeydiyyatı ləğv edilmişdir.

Azərbaycan qanunlarına zidd fəaliyyət göstərən təşkilatlar barədə tədbirlərin görülməsi davam etməkdədir.

Belə ki, ABŞ-da humanitar təşkilat statusu ilə qeydiyyatdan keçmiş və Azərbaycanda nümayəndəliyini açmış “Beynəlxalq Xeyriyyə Fondu”nun (Benovolens İnterneşnl Fondeyşn) terrorçu təşkilatlarla əməkdaşlıq etməklə, onlara yardımlar göstərməsi müəyyən olunmuşdur. Bununla əlaqədar, Azərbaycan Respublikası Ədliyyə Nazirliyi Kollegiyasının qərarı ilə bu təşkilatın dövlət qeydiyyatı ləğv edilmişdir.

Ölkəmizdə bərqərar olunmuş demokratik prinsiplərdən sui-istifadə edərək, dövlətimizin milli maraqları əleyhinə çıxan təşkilatların qarşısı bundan sonra da qətiyyətlə alınacaqdır.