Bakı, 13 sentyabr, AZƏRTAC

Sentyabrın 13-də Azərbaycan Dövlət Pedaqoji Universitetinin (ADPU) elmi şurasının 2019-2020-ci tədris ili üçün ilk iclası keçirilib.

ADPU-dan AZƏRTAC-a bildirilib ki, rektor, elmi şuranın sədri Cəfər Cəfərov iclasın gündəliyi barədə məlumat verib.

Qeyd olunub ki, iclasda ADPU-nun 2018-2019-cu tədris ilinin yaz-yay imtahan sessiyalarının nəticələri və 2019-2020-ci tədris ilinə hazırlığın vəziyyəti, 2019-2020-ci tədris ili üçün ali təhsilin bakalavriat və magistratura səviyyələri üzrə qəbulun nəticələri barədə məlumat veriləcək.

Tədris işləri üzrə prorektor, dosent Eldar Aslanov bildirib ki, 2018-2019-cu tədris ilinin yaz semеstrinin imtahan sessiyasını keçirmək üçün bütün hazırlıq işləri və təşkilati məsələlər vaxtında yekunlaşdırılıb. Semestr və eləcə də yekun dövlət attestasiyasında mütəşəkkilliyin təmin olunması məqsədilə universitet üzrə 30 təşkilatçı, o cümlədən 100 nəzarətçi əməkdaşdan ibarət imtahan qrupu yaradılıb. Həm imtahan qərargahına, həm də apelyasiya komissiyasına edilən müraciətlər çevik araşdırılıb, müvafiq qərarlar qəbul edilib.

Məruzəçinin çıxışında ADPU-da ali təhsilin magistratura səviyyəsi üzrə, eləcə də filiallar və ADPU-nun nəzdində Azərbaycan Dövlət Pedaqoji Kolleci üzrə müvəffəqiyyət və keyfiyyət göstəriciləri, habelə 2019-2020-ci tədris ilinə hazırlığın vəziyyəti və yeni tədris ilində qarşıda duran vəzifələr də öz geniş əksini tapıb.

Sənəd qəbulu komissiyasının məsul şəxsi, dosent Razim Məmmədov 2019-2020-ci tədris ili üçün ali təhsilin bakalavriat səviyyəsi üzrə qəbulun nəticələri haqqında məlumat verib.

Magistratura və doktorantura şöbəsinin müdiri, professor İbrahim Bayramov 2019-2020-ci tədris ili üçün ali təhsilin magistratura səviyyəsi üzrə qəbulun nəticələrindən danışıb.

Sonda cari məsələlər müzakirə olunub və müvafiq qərarlar qəbul edilib.