AFR-də çevriliş hazırlamaqda şübhəli bilinən 23 nəfər həbs olunub

Bakı, 9 dekabr, AZƏRTAC

Almaniyanın Federal Ali Məhkəməsi dövlət çevrilişi hazırlamaqda şübhəli bilinən 23 nəfərin, o cümlədən onları dəstəklədiyi iddia edilən rus qadının həbsinə order verib.

AZƏRTAC xəbər verir ki, bu barədə AFR mətbuatı Almaniya Baş prokurorluğuna istinadla məlumat yayıb.

“Dekabrın 7-8-də Federal Ali Məhkəmənin müstəntiq hakimləri 22 Almaniya vətəndaşına, habelə Rusiya vətəndaşı Vitaliya B.-yə qarşı həbs qərarlarını icra ediblər”, - məlumatda belə deyilir.

Baş Prokurorluq onların ötən çərşənbə günü saxlandığını xatırladıb. Qeyd olunub ki, dövlət çevrilişinə hazırlıq işi çərçivəsində İtaliya və Avstriyada saxlanılan daha iki almanla bağlı "ekstradisiya proseduruna başlanılıb”.