Bakı, 8 may, AZƏRTAC

Sosial siyasət dövlətimizin əsas prioritetlərindəndir. Əhalinin rifah halının yaxşılaşdırılması, həssas təbəqədən olan insanlara diqqət və qayğının göstərilməsi Prezident İlham Əliyevin və Birinci vitse-prezident Mehriban xanım Əliyevanın böyük önəm verdiyi məsələlərdəndir. Dövlətimiz tərəfindən bayramlarda və əlamətdar günlərdə aztəminatlı, şəhid, qazi və digər həssas qrupdan olan ailələrə hədiyyə, sovqat və yardım paylanması artıq ənənə halını alıb. Azərbaycan Həmkarlar İttifaqları Konfederasiyası (AHİK) da belə sosial tədbirlərdə yaxından iştirak edir və dəstəyini əsirgəmir.

AZƏRTAC xəbər verir ki, AHİK-in İcraiyyə Komitəsi aprelin 30-da ümummilli lider Heydər Əliyevin anadan olmasının 98-ci ildönümü münasibətilə xüsusi yardıma və qayğıya ehtiyacı olan aztəminatlı ailələrə, təqaüdçülərə ərzaq yardımlarının paylanmasını nəzərdə tutan yeni qərar qəbul edib. Bu məqsədlə respublikanın 76 şəhər və rayonunda yaşayan 4000 aztəminatlı ailəyə ərzaq sovqatının paylanması qərara alınıb. İclasda, həmçinin Naxçıvan Muxtar Respublikasında yaşayan 1000 ailəyə ərzaq göndərilməsi nəzərdə tutulub.

Mayın 8-də Azərbaycan Həmkarlar İttifaqları Konfederasiyasının təşkilatçılığı ilə avtomobil karvanı ərzaq sovqatlarını ünvanlarına çatdırmaq üçün 76 şəhər və rayona yola düşüb. Azərbaycanın bütün bölgələrini əhatə edəcək bu aksiyada yerlərdəki həmkarlar ittifaqlarının fəalları da iştirak edəcəklər.

Xatırladaq ki, AHİK 2020-ci il aprelin 29-da, bu il martın 17-də aztəminatlı ailələrə maddi və mənəvi yardım məqsədilə respublikanın bütün şəhər və rayonlarında yaşayan 3900 ailəyə maşın karvanları ilə 68 ton ərzaq sovqatı göndərib.

AHİK-in sədri, Milli Məclisin deputatı Səttar Möhbalıyev jurnalistlərə müsahibəsində bildirib ki, Azərbaycan Prezidenti vətəndaşlarımızın sağlamlığının qorunması və rifah halının yaxşılaşdırılmasını hər zaman diqqət mərkəzində saxlayır. Bu, bir daha təsdiq edir ki, sosial məsələ dövlət siyasətinin əsas prioritetlərindəndir. Onun sözlərinə görə, 2020-ci ildən bu günədək AHİK və üzv təşkilatlar tərəfindən koronavirus pandemiyası və Vətən müharibəsi ilə əlaqədar ümumilikdə 12 milyon manata yaxın vəsait xərclənib. O cümlədən pandemiya ilə əlaqədar AHİK və üzv təşkilatları tərəfindən göstərilən maddi yardımlar 7,167,749 manat təşkil edib. AHİK tərəfindən Heydər Əliyev Fondunun “Regional İnkişaf” İctimai Birliyinə 705 min manat, Koronavirusla Mübarizəyə Dəstək Fonduna 458 min 920 manat vəsait köçürülüb.

Deputat vurğulayıb ki, Azərbaycanın 44 günlük Vətən müharibəsində Qələbəsi hər birimizi sevindirir və qürurlandırır. Bildirilib ki, Prezident, Müzəffər Ali Baş Komandan İlham Əliyevin rəhbərliyi ilə Ordumuz düşməni torpaqlarımızdan qovaraq ölkəmizin ərazi bütövlüyünü bərpa edib. Vətən müharibəsində canından keçən şəhidlərin ailələrinin, qazilərin problemlərinin diqqətdə saxlanılması hər birimizin vətəndaşlıq borcudur. 152 şəhid ailəsinin AHİK tərəfindən himayəyə götürüldüyünü deyən Səttar Möhbalıyev diqqətə çatdırıb ki, bu ailələrin övladları 18 yaşına çatanadək diqqətdə saxlanılacaq və hər ay bu uşaqlara maddi yardım göstəriləcək. Onun sözlərinə görə, rəhbərlik etdiyi təşkilat tərəfindən Qarabağ Dirçəliş Fonduna 600 min manat, “YAŞAT” Fonduna 300 min manat yardım edilib. Sədr Silahlı Qüvvələrə yardım fonduna 1 milyon manatdan artıq vəsaitin köçürüldüyünü də diqqətə çatdırıb.

AHİK sədri qeyd edib ki, Vətən müharibəsi və koronavirus pandemiyası ilə əlaqədar həmkarlar ittifaqları təşkilatları tərəfindən ehtiyacı olan vətəndaşlara maddi və mənəvi yardım göstərilməsi davam etdiriləcək.