İDMAN
AKROBATLAR GƏNC İDMANÇILARIN UĞURUNU TƏKRAR EDƏ BİLMƏDİLƏR
Respublikanın Gimnastika Federasiyasında AZƏRTAC-ın müxbirinə bildirmişlər ki, Azərbaycan dueti tarazlı, sürətli və qarışıq təmrinlərin yerinə yetirilməsində 43.83 bal toplayaraq, 13-cü yeri tutmuşdur.
Kişi qrupu tarazlı və sürətli proqramların icrasından sonra 4-cü yerdə olmuşdur və bu, səkkiz finalçı sırasına çıxmağa imkan verirdi. Lakin qarışıq hərəkətdə piramida qurularkən akrobatlardan biri yıxılmışdır. Bu səhvə və hərəkətlərdə mürəkkəblik olmadığına görə hakimlər 2 balı ləğv etmişlər. Nəticədə, həmyerlilərimiz 46.22 bal ilə 10-cu olmuşlar.
Ümumi hesabda dünya çempionu adını Rusiya akrobatları qazanmışlar. İkinci yerə Ukrayna, üçüncü yerə Böyük Britaniya komandaları çıxmışlar.
Xatırladaq ki, çempionatdan əvvəl bu şəhərdə keçirilən idman akrobatikası üzrə III Ümumdünya gənclər oyunlarında 11-16 yaşlılar dərəcəsində çıxış edən İlham Abbasov, Rüstəm Nəcəfquliyev, Vüqar Əhmədov və Fərid Məmmədovdan ibarət dördlüyümüz ikinci yeri tutmuşdu.