Mən möhtərəm Prezidentimiz Heydər Əliyevin hörmətli İlham Əliyevin Azərbaycan Respublikasının Baş naziri təyin olunması ilə əlaqədar Milli Məclisə etdiyi müraciəti, demək olar ki, bütün Azərbaycan xalqının ürəyindən gələn istəkdən qaynaqlanan bir addım kimi qiymətləndirirəm. Bu sözlərin təsdiqi kimi burada gündəlik elan olunarkən Azərbaycan Respublikası Milli Məclisinin bütün deputatlarının alqışlarını misal gətirmək istəyirəm. Eyni zamanda onu bildirmək istəyirəm ki, əgər bu məsələ ümumxalq müzakirəsinə qoyularsa, əminliklə deyirəm - bütün xalq bu təklifi beləcə alqışla qarşılayacaqdır. Ona görə ki, Azərbaycan xalqı Heydər Əliyevin siyasi xəttinin, onun müəyyənləşdirdiyi siyasətin ən layiqli davamçısı kimi məhz İlham Əliyevi görür.

Bütün bu illər ərzində Heydər Əliyevin müəyyənləşdirdiyi xəttin həyata keçirilməsində İlham Əliyevin yaxından iştirak etməsi ona belə bir nüfuz və hörmət qazandırmışdır. İlham Əliyev artıq nəinki Azərbaycanda, ölkəmizin hüdudlarından kənarda da tanınmış siyasətçidir. Onun Avropa Şurasında Azərbaycanın maraqlarının müdafiə edilməsi istiqamətində apardığı böyük işlər və mən deyərdim ki, fədakarlıq hər bir Azərbaycan vətəndaşında qürur hissləri doğurmuşdur. Əminliklə bildirmək istəyirəm, Azərbaycan vətəndaşlarının hər birində belə bir qəti rəy də formalaşmışdır ki, İlham Əliyev istənilən sahədə Azərbaycanın milli maraqlarını qorumaqdan ötrü bu fədakarlığı həm nümayiş etdirməyə hazırdır, həm də Azərbaycanın maraqlarını qorumaq üçün kifayət qədər qətiyyətə, bacarığa və siyasi müdrikliyə malik bir siyasətçidir. İlham Əliyev həm də bacarıqlı bir təşkilatçıdır. Murtuz müəllimin vurğuladığı kimi, qeyd etdiyi kimi onun Dövlət Neft Şirkətinin birinci vitse-prezidenti vəzifəsində fəaliyyəti dediklərimizə sübutdur. Daha bariz sübut kimi İlham Əliyevin Milli Olimpiya Komitəsinə rəhbərlik etdiyi dövrdə Azərbaycanda idmanın və kütləvi bədən tərbiyəsinin sürətli inkişafını qeyd etmək olar.

Bütün bunların hamısı Azərbaycan xalqının, vətəndaşlarımızın qürur mənbəyinə çevrilmişdir. Azərbaycanın bayrağının mötəbər idman yarışlarında ucaldılması ölkəmizin bütün dünyada ən inamlı təbliğat vasitəsinə çevrilmişdir.

İlham Əliyevin şəxsi keyfiyyətləri də ona Azərbaycan vətəndaşları, ölkə ictimaiyyəti arasında böyük hörmət qazandırmışdır. Mən bunları xüsusi sadalamaq istəmirəm. Ancaq İlham Əliyevi tanıyanların hər biri onun bu qədər böyük işlər görməsinin müqabilində nə qədər sadə və təvazökar insan olduğunu bilirlər və qiymətləndirirlər. Bunların hamısı belə bir qəti rəy formalaşdırıb ki, İlham Əliyevin bundan əvvəl rəhbərlik etdiyi sahələrdə hansı irəliləyişlər baş veribsə, Baş nazir təyin olunduqdan sonra eyni irəliləyişlər Azərbaycan hökumətinin də fəaliyyətində olacaqdır.

Təbiidir ki, biz Heydər Əliyevin rəhbərliyi altında Azərbaycanda çox böyük islahatların həyata keçirildiyini qiymətləndiririk. Azərbaycanın hər bir vətəndaşı ölkəmizdə sabitliklə yanaşı, çox ardıcıl islahatların aparıldığını da görür və onun bəhrələrini duyur. Eyni zamanda, biz onu qiymətləndirmək istəyirik ki, İlham Əliyevin bu vəzifəyə təyin olunması bu sahədə də hökumətin fəaliyyətində bizim hamımız üçün məmnunluq doğuracaq bir canlanmaya, yüksək səmərəliliyə gətirib çıxaracaqdır.

Mən onu da demək istəyirəm ki, Yeni Azərbaycan Partiyasının 300 mindən yuxarı hər bir üzvü öz sədrinin birinci müavini İlham Əliyevin fəaliyyətini bütün bu dövrlər ərzində dəstəklədiyi kimi, bu vəzifəyə təyin olunduğundan sonra da onun hər bir addımını fədakarcasına və sədaqətlə dəstəkləyəcəkdir. Eyni zamanda bildirmək istəyirəm ki, nəinki partiyamızın üzvləri, həm də Heydər Əliyevə sədaqətli olan, Heydər Əliyev xəttinin əhəmiyyətini dərk edərək yüksək qiymətləndirən, bu 10 il ərzində Heydər Əliyevə dəstək verən Azərbaycan xalqı da Baş nazir kimi İlham Əliyevin bütün işlərində fəaliyyətini eyni dərəcədə dəstəkləyəcəkdir və ona kömək olacaqdır.

Mən istəyirəm İham Əliyevi təbrik etməklə yanaşı, ona bildirəm ki, Yeni Azərbaycan Partiyasının bütün üzvləri, Azərbaycan xalqının mütləq əksəriyyəti ona bütün işlərində, Heydər Əliyev xəttinin uğurla davam etdirilməsində möhkəm və etibarlı dayaq olacaqdır. Eyni zamanda hörmətli Prezidentimizə cansağlığı diləyirəm və əminəm ki, o, öz müalicəsini başa çatdırıb yaxın zamanlarda Azərbaycana qayıdacaq və öz rəhbərliyi altında bütün bu işlərin daha da sürətlə getməsinə rəvac verəcəkdir.

Təbrik edirəm və cansağlığı arzulayıram. Sağ olun.