İDMAN


AMADA dünyada ilk dəfə olaraq görmə imkanları məhdud idmançılar üçün innovasiyalar təqdim edib

Bakı, 16 may, AZƏRTAC

Azərbaycan Milli Antidopinq Agentliyi Bakıda ümummilli lider Heydər Əliyevin xatirəsinə həsr olunan paracüdo üzrə beynəlxalq Qran-Pri yarışlarında dopinqlə mübarizə sahəsində dünyada ilk olaraq innovativ təşviqat proqramını təqdim edib.

AMADA-dan AZƏRTAC-a bildiriblər ki, 36 ölkədən 400-dən çox qonağın iştirak etdiyi turnir üçün hazırlanan xüsusi təşviqat proqramı çərçivəsində Azərbaycan və ingilis dillərində Brayl əlifbası ilə çap edilmiş üç növ məlumatlandırıcı materiallar və testlər hazırlanıb və paylanılıb.

Həmçinin AMADA dünyada ilk dəfə olaraq görmə imkanları məhdud idmançılar üçün interaktiv audio əsaslı “iQuiz” antidopinq viktorina sistemini hazırlayıb. Beş sualdan ibarət bu xüsusi qurğu onların məhdud imkanlarını nəzərə alaraq dopinqlə mübarizə sahəsində biliklərini yoxlamağa imkan verir. Hər düzgün cavab bir “vazari” xalı, hər səhv cavab isə “şido” cəriməsi ilə nəticələnir. İki səhv cavab verən iştirakçı məğlub olur. Ən azı dörd sualı düzgün cavablandıran cüdoçü isə “ippon”, yəni, qələbə qazanır.

Yarışda iştirak edən idmançılar, o cümlədən ikiqat Paralimpiya çempionumuz İlham Zəkiyev, bir sıra milli və xarici idmançılar turnirin keçirildiyi günlərdə antidopinq biliklərini nümayiş etdirərək AMADA-dan xüsusi hədiyyələr qazanıblar.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.