İDMAN


AMADA-nın 14 dopinq nəzarəti inspektoru beynəlxalq inspektor statusu alıb

Bakı, 26 aprel, AZƏRTAC

Azərbaycan Milli Antidopinq Agentliyinin (AMADA) 14 dopinq nəzarəti inspektoru Beynəlxalq Test Agentliyinin beynəlxalq dopinq bəzarəti inspektorları üçün təlim-sertifikat proqramını uğurla başa vurub. Dopinq nəzarəti inspektorları Ümumdünya Antidopinq Agentliyinin uyğunluq standartlarına cavab verən peşəkar mütəxəssis kimi beynəlxalq inspektor statusu alıblar. Bu isə dopinq nəzarəti inspektorlarına beynəlxalq yarışlarda, o cümlədən dünya çempionatları, Olimpiya oyunları və digər böyük yarışlarda, habelə yarışdan kənar dopinq nəzarəti prosesinə cəlb olunma hüququnu verir.

AMADA-dan AZƏRTAC-a bildiriblər ki, Beynəlxalq Test Agentliyi COVID-19 pandemiyası və onun gətirdiyi məhdudiyyətləri nəzərə alaraq təlimləri onlayn formatda keçirib. İştirakçılar proqram çərçivəsində ən qabaqcıl təcrübələri öyrənib, dopinq testləri üçün istifadə olunan ən son avadanlıq və üsullarla tanış olub, idmançılarla səmərəli ünsiyyət qurmaq və onlara vacib dəstəyi göstərməklə bağlı biliklərini təkmilləşdiriblər.

Təlim-sertifikat proqramı çərçivəsində AMADA-nın dopinq nəzarəti inspektorları onlayn kursları müvəffəqiyyətlə bitirib yekun imtahanından yüksək ballarla keçiblər.

Beynəlxalq dopinq nəzarəti inspektorları üçün təlim-sertifikat proqramının əsas məqsədi dünyada antidopinq sahəsində dopinq nəzarəti keyfiyyətinin artırılması üçün səylərin birləşdirilməsi və qabaqcıl təcrübələri təhlil edərək ən yaxşı standartların müəyyənləşdirilməsidir. Proqramda AMADA da daxil olmaqla, dünyanın 8 milli və regional antidopinq agentliyi iştirak edib. AMADA proqramın hazırlanmasında da aktiv iştirak edib, təcrübələrini və təkliflərini bölüşməklə layihəyə öz töhfəsini verib.

Qeyd edək ki, Azərbaycan Milli Antidopinq Agentliyi 2019-cu ildən Beynəlxalq Test Agentliyi ilə əməkdaşlıq edir.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.