Azərbaycan Milli Elmlər Akademiyasının Geologiya İnstitutunda gənc alimlər, aspirant və dissertantlar üçün 5 aylıq mühazirələr kursu açılmışdır.

Akademiyanın Yer elmləri bölməsinin mətbuat xidmətindən AZƏRTAC-a bildirmişlər ki, bu münasibətlə təşkil olunmuş tədbirdə bölmənin akademik-katibi, Geologiya İnstitutunun direktoru, akademik Akif Əlizadə kursun əhəmiyyətindən danışmış, onun institutda artıq üçüncü ildir keçirildiyini nəzərə çarpdırmışdır.

Qeyd olunmuşdur ki, mühazirələrin təşkilindən məqsəd Azərbaycan geologiyasına dair bilikləri gənc geoloqlara daha dərindən aşılamaqdır.

Sonra institutun petrologiya şöbəsinin müdiri, AMEA-nın müxbir üzvü Arif İsmayılzadənin “Kiçik Qafqazın strukturunda okean qabığı (Azərbaycan hüdudunda)” mühazirəsi dinlənilmişdir.