ELM VƏ TƏHSİL


AMEA Rəyasət Heyətinin iclasında bir sıra mühüm məsələlər müzakirə olunub

Bakı, 16 yanvar, P.İmanova, AZƏRTAC

Yanvarın 16-da Azərbaycan Milli Elmlər Akademiyasının (AMEA) Fizika İnstitutunda AMEA Rəyasət Heyətinin növbəti iclası keçirilib.

AZƏRTAC xəbər verir ki, əvvəlcə AMEA-nın prezidenti, akademik Akif Əlizadə gündəlikdəki məsələləri iclas iştirakçılarının diqqətinə çatdırıb.

Tədbirdə AMEA Rəyasət Heyəti üzvləri arasında vəzifə bölgüsündən irəli gələn kuratorluq fəaliyyətinin gücləndirilməsi məsələsi müzakirə olunub və müvafiq tapşırıqlar verilib. Sonra Fizika-Riyaziyyat və Texnika Elmləri Bölməsinin akademik-katibi, akademik Nazim Məmmədovun bölmənin 2018-ci ildəki elmi və elmi-təşkilati fəaliyyətinə dair məruzəsi dinlənilib.

N.Məmmədov bölmənin elmi istiqamətləri üzrə aparılan tədqiqatların prioritet istiqamətləri və mühüm nəticələri haqqında təqdimatla çıxış edib. Məruzə dinlənildikdən sonra müzakirələr aparılıb, suallar cavablandırılıb, müvafiq qərar qəbul edilib.

İclasda “Azərbaycan Milli Elmlər Akademiyasının vəzifə nomenklaturası”nın, “Azərbaycan Milli Elmlər Akademiyasının elmi müəssisə və təşkilatlarında elmi işçi vəzifələrinin tutulması üçün müsabiqənin keçirilməsinin müvəqqəti Qaydaları”nın təsdiqinə, AMEA Rəyasət Heyətinin 2015-ci il 15 aprel tarixli qərarına qismən dəyişiklik edilməsinə, həmçinin akademiyanın müxbir üzvü Dəmir Hacıyevin 90 illik yubileyinin qeyd edilməsinə dair qərarlar qəbul olunub.

Sonra “AMEA Professorlarının Koordinasiya Şurasının 2019-cu il üçün Fəaliyyət Planı”nın təsdiqi məsələsi müzakirəyə çıxarılıb. Şuranın sədri, professor, riyaziyyat elmləri doktoru Rövşən Bəndəliyev bildirib ki, AMEA-nın professorlarının akademiyanın elmi və elmi-təşkilati həyatında daha yaxından iştirakına nail olmaq, AMEA Nizamnaməsi ilə müəyyən edilmiş vəzifələrin icrasında, habelə kadr hazırlığında və innovativ fəaliyyətin inkişaf etdirilməsində onların fəal iştirakını təmin etmək üçün Rəyasət Heyətinin müvafiq qərarı ilə “AMEA-nın Professorlarının Koordinasiya Şurasının Əsasnamə”si təsdiq edilib. Qərarda şuraya “2019-cu il üçün fəaliyyət planı”nı hazırlayıb Rəyasət Heyətinə təqdim etmək tapşırılıb.

Rəyasət Heyəti bütün bunları nəzərə alaraq, “AMEA Professorlarının Koordinasiya Şurasının 2019-cu il üçün fəaliyyət planı”nı təsdiq edib, nəzərdə tutulan tədbirlərin həyata keçirilməsi istiqamətində tapşırıqlar verib.

UNESCO-nun Dünya Yaddaşı Proqramı üzrə Azərbaycan Milli Komitəsinin tərkibinin və Əsasnaməsinin təsdiqi ilə bağlı çıxış edən AMEA-nın vitse-prezidenti, akademik İsa Həbibbəyli bildirib ki, 1992-ci ildən fəaliyyət göstərən UNESCO-nun Dünya Yaddaşı Proqramının əsas məqsədi ölkələrin sənəd irsini əks etdirən dünya əhəmiyyətli sənədlərin, əlyazmaların, audiovizual vəsaitlərin, kitabxana, muzey, arxivlərdə saxlanılan materialların gələcək nəsillərə çatdırılması üçün qorunmasının təmin edilməsidir.

İ.Həbibbəyli Azərbaycan Respublikası tərəfindən təqdim olunmuş “Orta əsrlərə aid tibb və əczaçılıq əlyazmaları”nın 2005-ci ildə, “Məhəmməd Füzulinin “Divan” əlyazmasının surəti”nin isə 2017-ci ildə UNESCO-nun Dünya Yaddaşı Beynəlxalq Qeydiyyat Siyahısına daxil olunduğunu diqqətə çatdırıb. Qeyd edib ki, ölkəmizin yazılı irs nümunələrinin UNESCO-nun Dünya Yaddaşı üzrə Beynəlxalq Qeydiyyat Siyahısına daxil edilməsi sahəsində qurumlararası əlaqələrinin genişləndirilməsi və bu proqram çərçivəsində səmərəli fəaliyyətinin təmin edilməsi qurumun Dünya Yaddaşı Proqramı üzrə Azərbaycan Milli Komitəsinin yaradılması zərurətini meydana çıxarıb.

Rəyasət Heyəti qeyd olunanları və AMEA-nın Humanitar Elmlər Bölməsinin vəsatətini nəzərə alaraq, UNESCO-nun Dünya Yaddaşı Proqramı üzrə Azərbaycan Milli Komitəsinin tərkibinin və Əsasnaməsinin təsdiq edilməsini qərara alıb. Müvafiq sənədin Xarici İşlər Nazirliyinin yanında UNESCO üzrə Azərbaycan Respublikasının Milli Komissiyasına təqdim olunması da qərarda yer alıb.

Sonda kadr məsələlərinə baxılıb. Rəyasət Heyətinin qərarları ilə Səbuhi Qəhrəmanov AMEA-nın “Elm” nəşriyyatının direktoru, iqtisad üzrə fəlsəfə doktoru Nazim Şükürov “AMEA Yüksək Texnologiyalar Parkı” MMC-nin direktoru və Rəqsanə Əzizova AMEA Rəyasət Heyəti aparatının katibliyinin müdiri vəzifələrinə təyin olunublar.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.