ELM VƏ TƏHSİL


AMEA Yüksək Texnologiyalar Parkı “Azərişıq” ASC ilə innovativ layihələr həyata keçirəcək

Bakı, 13 fevral, AZƏRTAC

Azərbaycan Milli Elmlər Akademiyasının (AMEA) Yüksək Texnologiyalar Parkı (YT Park) burada istehsal olunan məhsulların satışı ilə bağlı aqressiv marketinq siyasəti həyata keçirir. Bununla bağlı YT Park “Azərsu” ASC, “AzərEnerji” ASC, Ekologiya və Təbii Sərvətlər Nazirliyi, BP şirkəti, Energetika Nazirliyi və digər qurumlarla görüşlər keçirib.

AMEA-dan AZƏRTAC-a bildirilib ki, aqressiv marketinq siyasətinin davamı olaraq fevralın 13-də YT Parkın rəhbərliyi “Azərişıq” ASC-nin nümayəndələri ilə görüşüb.

YT Parkın direktoru Nazim Şükürov rəhbərlik etdiyi qurumun fəaliyyətindən, burada istehsal olunan məhsullardan və həyata keçirilən innovativ layihələrdən danışıb. Bildirib ki, Prezident İlham Əliyevin “Azərbaycan Milli Elmlər Akademiyası (AMEA) Yüksək Texnologiyalar Parkının yaradılması haqqında” 2016-cı il 8 noyabr tarixli Sərəncamından irəli gələn məsələlərdən biri də YT Parkda istehsal olunan məhsulların dövlət əsaslı sifarişlə satın alınmasıdır.

Direktor YT Parkın iqtisadiyyatın davamlı inkişafına və rəqabət qabiliyyətinin artırılmasına, müasir elmi və texnoloji nailiyyətlərə əsaslanan innovasiya və yüksək texnologiya sahələrinin genişləndirilməsinə xidmət etdiyini diqqətə çatdırıb. O, “Azərişıq” ASC-nin nümayəndə heyətini YT Parkın strukturu ilə yaxından tanışlıq məqsədilə rəhbərlik etdiyi müəssisəyə dəvət edib.

“Azərişıq” ASC-nin texniki departamentinin direktoru Qədir İsmayılov YT Parkın fəaliyyətini yüksək qiymətləndirərək, təmsil etdiyi qurumun bu müəssisə ilə innovativ layihələrin həyata keçirilməsində və milli məhsullara üstünlük verilməsində maraqlı olduğunu bildirib.

Görüşdə yağ və sürtkü məhsullarının istehlakı ilə bağlı “Azərişıq” ASC-nin həcmi dəqiqləşdirilib, alqı-satqı və kommersiya müqaviləsinin bağlanması və digər müvafiq işlərin həyata keçirilməsi üçün razılıq əldə olunub.

Sonda YT Park ilə “Azərişıq” ASC arasında əməkdaşlıq perspektivlərinə dair fikir mübadiləsi aparılıb, birgə layihələrin həyata keçirilməsinin hər iki qurumun inkişafına müsbət təsir edəcəyi vurğulanıb.

Görüşdə “Azərişıq” ASC-nin texniki departamenti direktorunun birinci müavini Vüsal Qənbərov, YT Parkın infrastruktur üzrə direktor müavini, aqrar elmlər üzrə fəlsəfə doktoru Elxan Bayramov və strateji inkişaf üzrə direktor müavini Məmməd Bağırzadə də iştirak ediblər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.