ELM VƏ TƏHSİL


AMEA-nın Nizami Gəncəvi adına Ədəbiyyat İnstitutu illik hesabat verib

Bakı, 7 noyabr, AZƏRTAC

Azərbaycan Milli Elmlər Akademiyası (AMEA) Nizami Gəncəvi adına Ədəbiyyat İnstitutunun elmi şurasının növbəti iclası keçirilib. İclası institutun direktoru, akademik İsa Həbibbəyli açaraq gündəlikdəki məsələlər barədə məlumat verib. Sonra İsa Həbibbəyli institutun əməkdaşları Leyli Əliyevanı 70, Aidə Feyzullayevanı 80 illik yubileyləri münasibətilə təbrik edib.

İnstitutdan AZƏRTAC-a bildirilib ki, elmi katib, filologiya üzrə fəlsəfə doktoru Mehman Həsənli elmi müəssisənin 2019-cu il üzrə elmi və elmi-təşkilati fəaliyyəti haqqında hesabat verib. O bildirib ki, 2019-cu il Ədəbiyyat İnstitutu üçün istər elmi nailiyyətlərin əldə edilməsi, istərsə də elmi-təşkilati islahatların həyata keçirilməsi baxımından əlamətdar bir dövr olub.

Mehman Həsənli Azərbaycan Respublikası Prezidentinin fərman və sərəncamlarının icrası ilə bağlı institutda yerinə yetirilmiş işlər haqqında məlumat verib. Qeyd edib ki, Prezident İlham Əliyevin böyük Azərbaycan şairi İmadəddin Nəsiminin 650 illik yubileyinin qeyd edilməsi haqqında 2018-ci il 15 noyabr və ölkəmizdə 2019-cu ilin “Nəsimi ili” elan edilməsi haqqında 2019-cu il 11 yanvar tarixli sərəncamlarına uyğun olaraq Ədəbiyyat İnstitutunda elmi sessiya keçirilib, hürufizmin dünyada ən tanınmış tədqiqatçılarından biri olan professor Fatih Usluerin “İmadəddin Nəsimi Fəzlullah Nəiminin əlyazmalarında” mövzusunda elmi seminarı təşkil edilib. Ədəbiyyat İnstitutunun təşkilatçılığı ilə Şamaxıda və Suraxanıda İmadəddin Nəsiminin 650 illik yubileyinə həsr olunmuş elmi sessiyalar keçirilib.

O, institutda cari ildə İmadəddin Nəsimi ilə bağlı çap olunan kitabları təqdim edib. Qeyd olunub ki, institutun İmadəddin Nəsimiyə həsr olunmuş II Beynəlxalq “Ey Nəsimi cahanı tutdu sözün...” konfransı dekabrın 8-11-də keçiriləcək.

Elmi katib ölkə rəhbərinin sərəncamlarına uyğun olaraq Ədəbiyyat İnstitutunun təşkilatçılığı ilə yazıçı və dramaturq Cəfər Cabbarlı, görkəmli demokrat yazıçı, dramaturq, publisist və ictimai xadim Cəlil Məmmədquluzadə, akademik Həmid Araslı, akademik Məmməd Cəfər Cəfərov, Azərbaycan ədəbiyyatının görkəmli nümayəndəsi, Xalq yazıçısı İsmayıl Şıxlı, Xalq yazıçısı Hüseyn İbrahimov və Ceyhun Hacıbəylinin yubileyləri münasibətilə keçirdiyi tədbirləri diqqətə çatdırıb. O, həmçinin elmi-tədqiqat işləri, institut tərəfindən keçirilmiş digər konfranslar, sessiyalar, seminarlar və yubileylər, eləcə də institutun nəşriyyat fəaliyyəti, elmi məqalələr, o cümlədən xaricdə çap olunmuş məqalələr haqqında məlumat verib.

Sonra filologiya üzrə fəlsəfə doktoru Xanım Zairova institutun beynəlxalq əlaqələri üzrə fəaliyyətinin illik hesabatını təqdim edib.

Elmi şura institut şöbələrinin ayrı-ayrılıqda illik elmi hesabatlarının dinlənilməsi ilə davam edib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.