ELM VƏ TƏHSİL
AMEA-nın müxbir üzvü Məsumə Məmmədova “Soft Computing” üzrə səkkizinci ümumdünya konfransında məruzə edib
Bakı, 5 fevral, AZƏRTAC
AMEA İnformasiya Texnologiyaları İnstitutunun şöbə müdiri AMEA-nın müxbir üzvü Məsumə Məmmədova dünyaşöhrətli azərbaycanlı alim Lütfi Zadənin anadan olmasının 100 illiyinə və elmi irsinə həsr olunmuş “Soft Computing” üzrə səkkizinci ümumdünya konfransının bölmə iclasında məruzə edib.
İnstitutdan AZƏRTAC-a bildirilib ki, onlayn formatda keçirilən konfransda Məsumə Məmmədova “Dəniz neft platformasında personalın intellektual idarə olunmasının paylanmış sistemində qərarların qəbulu” mövzusunda çıxış edib. Məruzəçi bildirib ki, hazırda neft-qaz sənayesinin əməliyyat proseslərində çoxlu sayda ixtisaslı işçilər və mütəxəssislər çalışır və onların əmək fəaliyyəti sağlamlıq üçün potensial təhlükəli və riskli mühitdə baş verir. Bu səbəbdən işçilərin sağlamlığının idarə olunmasının effektivliyinin artırılması və təhlükəsizliyinin təmin edilməsi neft-qaz sənayesinin fəaliyyətinin əsas hissəsini təşkil edir.
Məruzəçi neft-qaz sənayesində əşyaların internetinin tətbiqləri haqqında məlumat verib, işçilərin sağlamlığının idarə olunması probleminin həllində bu qəbildən olan tədqiqatlara kifayət qədər diqqət ayrılmadığını bildirib. İnstitutun şöbə müdiri dəniz sənayesində işləyən neftçilərin sağlamlığının intellektual idarə olunması sistemində qərarların qəbulu istiqamətində aparılan tədqiqatın mahiyyətini konfrans iştirakçılarının diqqətinə çatdırıb, təqdim olunan metodologiyada insan mərkəzli yanaşma konsepsiyasına istinad edildiyini bildirib.
Dəniz neft platformasında çalışan işçilərin sağlamlığının idarə olunması sisteminin funksional modelini təqdim edən M.Məmmədova hər bir işçinin sağlamlıq göstəricilərinin və parametrlərinin monitorinqi, qiymətləndirilməsi və qərarların qəbul olunması əməliyyatları haqqında məlumat verib. O bildirib ki, bu qarşılıqlı əlaqəli əməliyyatlar vahid qərar qəbulu prosesinin halqalarını təşkil edir və işçilərin sağlamlığının intellektual idarə olunması üçün paylanmış sistemin səviyyələrində reallaşdığından hər bir səviyyə müvafiq alqoritm və intellektual vasitələrlə təmin edilmiş analitik bloklara malikdir.
Məsumə Məmmədova baxılan kontekstdə qərarların qəbulunun dəstəklənməsi prosesinin reallaşdırılması üçün mümkün yanaşmalar haqqında məlumat verib. O, həmçinin verilənlərin qiymətləndirilməsində qeyri-səlis məntiqə əsaslanan və qeyri-səlis obrazların tanınmasına istinad edən qərar qəbulu metodu haqqında ətraflı danışıb, perspektivləri nəzərə çatdırıb.
Məruzə konfrans iştirakçılarını marağına səbəb olub, suallar cavablandırılıb.