ABŞ-ın “Saba İnc.” şirkəti Bakıda yeddimərtəbəli bina tikməyi planlaşdırır. Bina ofislər, ticarət mərkəzi və yaşayış mənzilləri üçün nəzərdə tutulur.

Tenessi ştatının Memfis şəhərində yerləşən “Saba İnc.” şirkətindən AZƏRTAC-ın müxbirinə bildirmişlər ki, layihənin həyata keçirilməsi üçün ABŞ-ın İxrac-İdxal Bankından 19,3 milyon dollarlıq kredit təminatı alınmışdır. Vəsaiti Nyu-Yorkdakı “Kommerzbank” verəcəkdir.

“Saba İnc.” tikinti, mühəndis və dizayn işləri üçün 20 miylon dollar vəsait xərcləməyi nəzərdə tutur. Şirkətin prezidenti Con Ostinin sözlərinə görə, İxrac-İdxal Bankının dəstəyi sayəsində onlar “Azərbaycan kimi mühüm yeni bazarda ilk layihələrini həyata keçirə biləcəklər”.

Bankın sədri Filip Merril isə bildirmişdir ki, onun təmsil etdiyi maliyyə qurumunun niyyəti ABŞ-ın “Saba İnc.” kimi orta miqyaslı şirkətlərinə dünyada rəqabət aparmaqda yardım etməkdir.