İDMAN
AMPK-nın prezidenti paraüzgüçülük üzrə dünya çempionatında uğurla çıxış etmiş idmançımız ilə görüşüb
Bakı, 17 sentyabr, AZƏRTAC
Azərbaycan Milli Paralimpiya Komitəsinin (AMPK) prezidenti İlqar Rəhimov “London 2019” paraüzgüçülük üzrə dünya çempionatında uğurla çıxış etmiş Roman Saleh ilə görüşüb.
AMPK-dan AZƏRTAC-a bildiriblər ki, görüşdə dünya çempionatda gümüş və bürünc medallar qazanaraq “Tokio 2020” Paralimpiya Oyunlarına lisenziya əldə etmiş Roman Salehlə yanaşı, üzgüçülük üzrə paralimpiya yığma komandamızın baş məşqçisi Alavərdi Culfayev də iştirak edib.
Baş məşqçi A.Culfayev “London 2019” barədə komitə prezidentinə məlumat verib. O yarışların gərgin idman mübarizəsi şəraitində keçdiyini qeyd edib. “Tokio 2020” Paralimpiya Oyunlarınadək komandamızın digər üzvləri tərəfindən də lisenziyalar qazanılacağına inandığını qeyd edib.
Yarışların çətin keçdiyini deyən paralimpiyaçı R.Saleh əlavə edib ki, buna baxmayaraq qarşıda qoyulan əsas hədəf - “Tokio 2020” Paralimpiya Oyunlarına lisenziya qazanmaq idi. Sevinirəm ki, buna nail oldum. Paralimpiya Oyunlarında ölkəmizi layiqincə təmsil etmək üçün əlimdən gələni edəcəyəm.
İ.Rəhimov idmançıya və onun baş məşqçisinə yeni uğurlar arzu edib. Qeyd edib ki, “Tokio 2020” Paralimpiya Oyunlarında üzgüçülük komandasına ümidlərimiz böyükdür. Bu komandadan yalnız yüksək nailiyyətlər gözləyirik.